SOSİAL MEDIA

Grails Java  proqramlaşdırma texnologiyası ilə məşğul olan insanları  bir sosial şəbəkdə toplayan yeni layihə yaradılıb.

Bir çox startap layihəsindən yaxından tanıdığımız Ziya Əsgərov tərəfindən yaradılan qlobal Grails Developers platforması bu sahə ilə məşğul olan mütəxəssisləri bir araya gətirəcək.

Layihə rəhbəri Ziya Əsgərov Grails Developers barədə Xeberler.az-a ətraflı məlumat verib.

Ziya Əsgərov bildirib ki, bu layihə Grails proqramçılarını və bu texnologiyadan istifadə edən şirkətləri bir sosial platformada birləşdirən şəbəkədir.  Belə ki, şəbəkədə proqramçılar həmkarları ilə əlaqə yarada,  müzakirələr təşkil edə və həmçinin iş imkanı da əldə bilər.

Onun sözlərinə görə, layihənin sponsor şirkəti və sahibi amerikalı OCI şirkətidir:

“Layihəni ilk olaraq OCI şirkətinə təqdim etdik. Onlar layihəni bəyəndi və bizdən Grails Developers-in demo versiyasını istədilər. Biz də layihə hazırladıq. Sonra şirkət bizi Danimarkaya dəvət etdi. Əməkdaşlığımızı Danimarkada müzakirə etdik”.

Ziya Əsgərov deyib ki, şirkət onlarla əməkdaşlıq edib, layihənin fəaliyyətinə  dəstək göstərəcək və  populyarlaşmasını həyata keçirəcək.

Onun sözlərinə görə, artıq bu istiqamətdə şirkətlə razılaşıblar:

“Danimarkada bu texnologiya ilə bağlı 3 günlük konfrans keçirildi. Biz də həmin konfransda iştirak etdik. Konfransa OCI şirkətinin rəsmiləri də qatıldı. Əməkdaşlığımızı konfransda müzakirə etdik və razılaşdıq. Biz layihəyə texniki tərəfdən dəstək göstərəcəyik, onlar isə layihəyə sponsor olub, PR işlərini təşkil edəcək”.

Məltəm Talıbzadə