İNNOVASİYA VƏ STARTAP

Xeberler.az olaraq bu il Startap Azərbaycan müsabiqəsində iddiaçı olan layihələrlə bağlı yazılar yayımlamağa, startapları ictimaiyyətə təqdim etməyə davam edirik.

Ötən yazımızda Allrent startapından danışmışdıq.

Startap Azərbaycan-da qeydiyyatdan keçən layihələrdən biri də Təbii.AL startapıdır.

Təbii.AL veb və mobil platformalar vasitəsilə təbii məhsulların satışını həyata keçirir.

Layihənin məqsədi texniki şəraitdə hazırlanan məhsullar deyil, təbii şəraitdə və öz regionunda yetişdirilən məhsulların satışını həyata keçirməklə yanaşı, kənd təsərrüfatına öz töhfəsini verməkdir.

Təbii.AL startapı ilə bağlı daha ətraflı layihə rəhbəri Ələkbər Məmməd  ilə söhbət etdik.

Ələkbər Məmməd Xeberler.az-a bildirib ki, platformada  satılan məhsulların hamısı təbii şəraitdə yetişdirilmiş və keyfiyyətinə zəmanət verilən kənd təsərrüfatı mallarıdır:

“Biz həm alıcı, həm də satıcılarımızı tam hüquqi mühitlə təmin edirik. Layihəyə başlayanda bazar araşdırması da  etdik. Satacağımız məhsulların hazırki bazar qiymətlərini araşdırdıq. Eyni zamanda  araşdırdığmız qiymətləri alıcı və satıcıların  düşündükləri qiymətlərlə qarşılaşdırdıq və nəticəni buna görə müəyyənləşdirdik”.

Layihə rəhbəri qeyd edib ki,  platformada məhsulların çatdırılması da nəzərdə tutulduğu  üçün hələki istiqaməti yerli bazara yönəldiblər:

“Layihənin formalaşma və araşdırma mərhələsi artıq bitib. Məhsulları satacağımız və bizə qalan komissiya haqlarının qiymətləri, eyni zamanda çatdırılma və siğorta haqlarını da artıq planlaşdırmışıq. Layihə hazırda bizim plana görə "çözümlərin yaradılması", yəni, vebsayt və tətbiqlərin hazırlanması mərhələsindədir”.

Ələkbər Məmməd Startap Azərbaycan 2016-dan gözləntiləri barədə də danışıb:

“Startap Azərbaycan-dan gözləntilərimiz çoxdur (gülür).  Qalib ola bilməsək də ,  bu yarışmada iştirak həqiqətən bizim üçün böyük bir şans olacaq. Uzun müddətdir ki, Azərbaycanda heç bir startap yarışmasında iştirak etmədiyim üçün bu yarışma mənim üçün bir "geri dönüş" olacaq”.

Məltəm Talıbzadə