Azərbaycanlı startapçılar ABŞ-a gedir

05-09-2016 / 14:29

“Layihəmizi real dəstək olacaq şəxslərə təqdim etməyin zamanı çatıb”

Məlumat verdiyimiz kimi, sitat paylaşımı üçün mobil sosial şəbəkə olan Kvotter layihəsi 8-14 sentyabr tarixlərində Tractioncamp proqramı çərçivəsində ABŞ-ın San-Francisco şəhərində keçiriləcək startaplar üçün təlimlər, investorlar qarşısında təqdimat və TechCrunch Disrupt tədbirində iştirak edəcək.

Kvotter-i bu proqram müddətində layihənin 2 təsisçisi Orxan Əhmədov və Coşqun Kərimov təmsil edəcək.

Ötən həftə platforma Android telefonları üçün BETA versiyada istifadəyə verildi.

Kvotter komandası hazırda  ABŞ-da keçiriləcək tədbirə  hazırlaşır.

Xeberler.az olaraq komanda ilə bu barədə ətraflı söhbət etdik.

Layihə rəhbərlərindən Orxan Əhmədov bildirib ki, proqramda Azərbaycan, Albaniya, Belarus, Bosniya və Hersoqovina, Ermənistan, Gürcüstan, Kosovo, Makedoniya, Moldova, Serbiya və Ukraynadan seçilmiş startaplar iştirak edəcək.

Onun sözlərinə görə, Tractioncamp proqramı çərçivəsində iştirak edən layihələrə mentorlar tərəfindən 2 gün təlim, Silikon Vadisindən investorlar qarşısında təqdimat, Silikon Vadisində yerləşən Akseleratorlarla tanışlıq turu və TechCrunch Disrupt tədbirində startaplar üçün ayrılmış xüsusi bölmədə yer təqdim ediləcək.

Orxan Əhmədov qeyd edib ki,  Kvotter üzərində işə başlayan andan, bu layihəni qlobal bazar üçün hazırlamalı olduqları əsas prioritetlərdən olub:

“Platformanın Android Beta tətbiqi istifadəyə verilib və Silikon Vadisinə səyahətin əsas məqsədi də Kvotter-i ABŞ-dan olan investorlar və potensial istifadəçilərə təqdim etməkdir”.

Kvotter-in digər təsisçisi olan Coşqun Kərimovun dediyinə görə onlar  Kvotter-i qurmamışdan öncə 100-dən çox xarici əsilli şəxslərdən rəy toplayıblar:

“Bu rəylərin toplanması üçün biz 2 il zaman sərf etmişik və layihəyə tələbat olduğuna tam əmin olduqdan sonra işə başladıq. İndi layihə hazırdır və onu layihəyə real dəstək edə biləcək şəxslərə təqdim etməyin zamanı gəlib çatıb”.

Qeyd edək ki,  layihə komandası sabah ABŞ-a yola düşür.

Əlavə olaraq bildirək ki, Kvotter 2017-ci ilin aprel ayında İsveçrədə keçiriləcək SeedStars World tədbirində Azərbaycanı təmsil edərək, 500 min dollar uğrunda mübarizə aparacaq.

 

 

 Məltəm Talıbzadə


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə