Azərbaycanda kibertəhlükəsizlik məsələləri müzakirə edilib- Fotolar

18-04-2016 / 15:57

Kaspersky Lab şirkəti Bakıda “Kibertəhlükəsizlik Həftəsonu” (Cyber Security Weekend) konfransı keçirib.

Tədbirdə Orta Şərq, Türkiyə, Afrika və Azərbaycandan olan jurnalistlər, aparıcı biznes nümayəndələri və informasiya təhlükəsizliyi üzrə ekspertlər müzakirələr aparmaq üçün bir araya gəliblər. Builki tədbirin başlıca mövzusu son illər ərzində iri müəssisələrin mütəmadi olaraq üzləşdiyi kiberhadisələrin fonunda əhəmiyyəti və aktuallığı sürətlə artan sənaye obyektlərinin kibertəhlükəsizlik məsələləri olub.

Xeberler.az-ın məlumatına görə, tədbir çərçivəsində sənaye obyektlərinin kibertəhlükələrə məruz qaldığı hallar nəzərdən keçirilib və xüsusi əhəmiyyətə malik infrastrukturların, o cümlədən sənaye obyektlərinin qorunması üçün  ixtisaslaşdırılmış həll olan Kaspersky Industrial CyberSecurity məhsulunun təqdimatı keçirilib.

Konfransda həmçinin Kaspersky Lab mütəxəssisləri xüsusi texnologiyaların tətbiqi ilə şəhərin enerji istehlakının effektivliyini, rahat, ekoloji və fiziki baxımdan təhlükəsiz olmasını təmin edən “ağıllı şəhərlər” sisteminin təhlükəsizlik məsələlərini müzakirə ediblər. Bununla belə, sözügedən “ağıllı şəhərlər”in informasiya təhlükəsizliyi məsələləri təəssüf ki, adətən ikinci plana keçirilir, halbuki son zamanlar müxtəlif ssenarili kiberhücumların həyata keçirilməsində yüksək texnologiyaların istifadəsi riski sürətlə artır.

Konfrans ərzində Kaspersky Lab kibertəhlükəsizlik sahəsində qlobal və regional təhdidlərin, mövcud tendensiyaların icmalını təqdim edib, maliyyə fırıldaqçılığı və pul oğurluğuna yönəlmiş xüsusi proqramlar kimi regionda, o cümlədən Azərbaycanda olan əsas təhlükə vektorlarını vurğulayıblar.

Şirkət mütəxəssisləri həmçinin Azərbaycanda istifadəçilərin 2016-cı ildə məruz qaldığı kibertəhlükələrin statistikasını təqdim ediblər. Göstəricilərə əsasən ölkədə sözügedən təhdidlərin sayında artım müşahidə olunur.

 Kaspersky Lab mütəxəssisləri Kaspersky Security Network bulud infrastrukturu vasitəsilə 2016-cı ilin yanvar-may dövrü ərzində toplanmış statistikanı nümayiş etdiriblər.

Statistik göstəricilərə əsasən, Azərbaycan istifadəçilərinin 30,2%-i internet şəbəkəsində təhlükələrlə qarşılaşıb. 54% istifadəçi isə elektron daşıyıcılar və lokal şəbəkələrin təhlükəsizlik sistemində problemlərlə rastlaşıb. Ümumilikdə Orta Şərq, Türkiyə və Afrika ölkələrində bu göstəricilər müvafiq olaraq 15% və 45% təşkil edib. Orta Şərq ölkələri üzrə Kaspersky Lab həlləri tərəfindən 2016-cı ilin birinci rübü ərzində aşkarlanmış kiberhadisələrin ümumi sayında ötən ilin eyni dövrü ilə müqayisədə 15% artım müşahidə olunub. Qeyd edək ki, Azərbaycanda bu göstəricinin artımı 4% təşkil edib. 

 

Zərərli proqram təminatı bütün dünyada, o cümlədən Azərbaycanda sürətlə yayılır və bu cür proqramların hücum obyekti həm şirkətlər, həm də adi istifadəçilər olur. Ötən ilin birinci rübü ilə müqayisədə bütün region ölkələrində Kaspersky Lab texnologiyaları tərəfindən aşkarlanmış və qarşısı alınmış hücumların sayında artım müşahidə olunub: Azərbaycanda pul oğurluğuna yönəlmiş proqramlarla bağlı halların sayı 14% artıb ki, Orta Şərqdə bu artım 67%, Türkiyədə isə 58% təşkil edib.

“Demək olar ki, hər il adi istifadəçilər, həmçinin şirkətlər üçün şəbəkədə olan kibertəhlükələrin sayında artım müşahidə edirik. Dövrümüzdə internet şəbəkəsinə qoşulmaq üçün müxtəlif növ cihazlardan, masaüstü kompüterlərdən, smartfonlardan, televizorlardan, saatlardan, hətta fotoaparatlardan istifadə olunur. Ancaq təəssüf ki, informasiya təhlükəsizliyi heç də həmişə təmin olunmur. Elektron cihazlardan məxfi məlumatların saxlanması, onlayn, o cümlədən mobil ödəmələrin həyata keçirilməsində istifadə edilir və son zamanlar hətta iri müəssisələr də tez-tez kibercinayətkarların hücumuna məruz  qalırlar. Sevindiricidir ki, artıq Azərbaycanda həm adi istifadəçilər, həm də korporativ şirkətlər təhlükəsizlik məsələlərinə böyük diqqət ayırırlar. Belə ki, informasiya təhlükəsizliyi məsələlərində qənaət edilməsi və ya diqqətsizlik çox ciddi fəsadlara səbəb ola bilər”, - deyə Kaspersky Lab şirkətinin Azərbaycan üzrə regional nümayəndəsi Müşviq Məmmədov vurğulayıb.

Regionda mobil rabitə xidmətlərindən istifadənin genişlənməsi daim öz alətlərini təkmilləşdirən kibercinayətkarların diqqətini cəlb etməkdə davam edir.

Kaspersky Lab-ın statistik göstəricilərinə əsasən, 2016-cı ilin birinci rübündə bir sıra region ölkələri smartfonlarda kiberhadisələrlə qarşılaşan istifadəçilərin nisbətinə görə dünyanın ilk 20-liyində yer alıblar. Nəticələrə əsasən, Azərbaycan 9,3% göstərici ilə 20-ci yerdə qərarlaşıb. Müqayisə üçün qeyd edək ki, Misir 12% göstərici ilə 13-cü, Türkiyə 10,7% ilə 14-cü, Keniya 9,4% ilə 18-cidir. Mobil platformalarda hücumlar kibercinayətkarlar tərəfindən “yoluxdurulmuş” mobil tətbiqlərin yüklənməsi və ya ucuz smartfonların baza proqram təminatında zərərli proqramların mövcudluğu halında daha effektiv olurdu.

Məltəm Talıbzadə

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.