İnnovasiya həftəsi çərçivəsində Kaspersky Security Day keçirilib

28-10-2019 / 12:37

Nəqliyyat, Rabitə və Yüksək Texnologiyalar Nazirliyinin dəstəyi ilə “Kaspersky” şirkəti ilə birgə keçirilən tədbirdə Elektron Təhlükəsizlik Xidmətinin rəisi Faiq Fərmanov açılış nitqi ilə çıxış edib. O, bildirib ki, internetdən təhlükəsiz istifadə ilə bağlı təmsil etdiyi qurum tərəfindən mütəmadi olaraq maarifləndirmə və məlumatlandırma tədbirləri həyata keçirilməkdədir.

Xeberler.az bildirir ki, il ərzində müxtəlif təhsil müəssisələrində uşaqların, müəllim və valideynlərin sahə üzrə maarifləndirilməsi məqsədilə təlimlər və tədbirlər təşkil olunur. Daha sonra “Kaspersky” şirkətinin mütəxəssisləri tərəfindən Azərbaycanda istifadəçilərin qarşılaşdığı kiber təhlükələr barədə geniş məlumat verilib, son statistik göstəricilər diqqətə çatdırılıb.

Bildirilib ki, “Kaspersky” şirkətinin Azərbaycanda 2019-cu ilin yanvar-sentyabr aylarında apardığı anonim statistikaya əsasən, bu müddət ərzində ölkədə fərdi kompüter istifadəçilərinin 42 faizi ən azı bir dəfə müxtəlif kiber təhdidlərlə qarşılaşıb. İstifadəçilərin yarısı isə (52 faiz) müxtəlif məlumat daşıyıcıları vasitəsilə (yaddaş kartları, hard disklər) yayılan zərərli proqram təminatları ilə bağlı təhdidlərə məruz qalıb. Bundan əlavə, Azərbaycanda mobil cihaz istifadəçilərinin təxminən 3 faizi zərərli proqram təminatı ilə üzləşib.

Yanvar-sentyabr ayları ərzində Azərbaycanda şirkət işçilərinin 13 faizi zərərli proqramlarla hücum cəhdləri ilə qarşılaşıblar. Lokal təhdidlər üzrə bu göstərici daha çox, yəni 35 faiz təşkil edib.

Ötən müddət ərzində ən çox şifrələmə və hədələmə proqramları aktivləşib. Belə ki, “Kaspersky” keçən ilin ortasında (ikinci rüb ərzində) 7,5 minə yaxın belə zərərli proqram aşkar edib, 2019-cu ilin ikinci rübündə isə bu göstərici 16 mini keçib. Son üç rüb ərzində Azərbaycanda hər 70 istifadəçidən biri şifrləmə proqramları ilə qarşılaşıb.

2019-cu ilin 9 ayı ərzində “Kaspersky” həlləri internetin Azərbaycan sektorunda olan istifadəçilərinin fişinq səhifələrinə köçürülməsi ilə bağlı 388 min cəhdin qarşısını alıb.

“Cinayətkarlar daim yeni hücum metodları icad edir, hücum alətləri inkişaf etdirir, qurbanların yeni kateqoriyalarını axtarırlar. Belə şəraitdə kibertəhlükəsizlik bir dəfə quraşdırılmış və konfiqurasiya edilmiş proqram təminatı deyil, bu təhlükəsizlik həllərinin istifadəsi, müxtəlif ekspert xidmətləri və təlimlərin qoşulması, geniş məlumat axınının analizi və sistemin bütün elementlərinin idarə olunmasını əhatə edən davamlı bir prosesdir. Başqa sözlə, bu gün kibertəhlükəsizliyə çoxsəviyyəli bir yanaşma vacibdir” - bunu “Kaspersky” şirkətinin Azərbaycandakı rəsmi nümayəndəsi Müşviq Məmmədov deyib.

Eyni zamanda, tədbirdə kiber təhlükələrdən qorunmaq üçün istifadəçilərin riayət etməsi tövsiyə olunan əsas qaydalar barədə danışılıb.


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.