İNNOVASİYA VƏ STARTAP

Məlumat verdiyimiz kimi, sitat paylaşımı üçün mobil sosial şəbəkə olan Kvotter layihəsi 8-14 sentyabr tarixlərində Tractioncamp proqramı çərçivəsində ABŞ-ın San-Francisco şəhərində keçirilən startaplar üçün təlimlər, investorlar qarşısında təqdimat və TechCrunch Disrupt tədbirində iştirak edir.

Kvotter-i bu proqram müddətində layihənin 2 təsisçisi Orxan Əhmədov və Coşqun Kərimov təmsil edir.

Həmyerlilərimiz hazırda TechCrunch Disrupt tədbirinin keçirildiyi məkandadır.

Qeyd edək ki, layihə təsisçiləri bu müddət ərzindəki təcrübələrini opretaiv olaraq sosial mediadan bölüşür.

Layihə rəhbələri qeyd edir ki, hazırda tədbirdə demək olar ki, dünyanın bütün yerlərindən iştirakçılar var:

“Digər ölkələrdən yaxşı komandalar var. Onlar ən yaxşı layihələrini təqdim etməyə çalışır. Bununla yanaşı, tədbirdə müxtəlif ölkələrdən ( Koreya, Yaponiya, Avropa) akselerator da iştirak edir. Onlar da tədbirdə maraqlı layihələri yaxşı təkliflərlə öz vətənlərinə cəlb etməyə çalışır”.

 Həmyerlilərimiz deyir ki, tədbir çərçivəsində iştirakçılar üçün hər cür şərait yaradılıb, yəni hər hansı ehtiyac üçün məkandan kənara çıxmağa ehtiyac yoxdur:

“ Burada çox müsbət, məhsuldar mühit var.Yaxşı olardı ki, ölkəmizdə təşkil edilən böyük İKT tədbirlərində ( Bakutel) bu təcrübədən istifadə edilsin”.

 Yerli layihə Kvotter-a maraq böyükdür

 “Biz də layihəmizi maraqlı tərəflərə təqdim edib, bütün gün burada Kvotter-i təmsil edirik. Layihəmiz ilə maraqlananlar var. Bir yazıçı ilə tanış olduq. Bizim platformanın onların da maraq dairəsində olduğunu qeyd etdi”.

 Kvotter sabah TechCrunch Disrupt sərgisində təqdim ediləcək.

Disrupt çərçivəsində müxtəlif istiqamətli startap layihələri öz məhsullarını təqdim etməklə tədbir çərçivəsində çoxsaylı investor və vençur fondları ilə danışıqlar aparıb, layihələrinin inkişafı üçün investisiya əldə etmək imkanı qazanır.

Azərbaycanı bu tədbirdə ilk dəfə Kvotter təmsil edir. 

Məltəm Talıbzadə