STARTAP AZƏRBAYCAN

 Azərbaycanlı startapçılarımız Çili Respublikasında  startap müsabiqəsində uğur qazanıb.

Azərbaycanlı startap komandası 2015-ci ilin mart ayında Çilidə “Start-Up Chile” müsabiqəsinə müraciət edib. Onların Tradimum.com layihəsi 2700 layihə arasından ilk 100-ə daxil olmuş, iyul ayında aparılan müsahibələr əsasında qalib gələn 70 layihənin siyahısına daxil olub. Bununla da qaliblər üçün büdcə, ofislər, bir illik viza və təlim imkanları təmin edilir.

Tradimum.com kiçik və orta müəssisələr üçün bulud əsaslı iş idarəetmə platformudur. Layihə komandasının dörd üzvü  var. Onlardan 3-ü  Türkiyədə təhsil alan və işləyən azərbaycanlılardır. Komanda heyəti Turqut Kərim, Həsən Cabbarov, Zamin Namazov və Erhan Atlıntaşdan ibarətdir.

Komandanın bəzi üzvləri beş il birlikdə Türkiyədə fəaliyyət göstərmiş və 80-ə yaxın şirkət üçün şəxsi bulud əsaslı iş idarəetmə proqramları hazırlayıblar. Sonradan ERP (müəssisə resurs planlaması) sistemlərinin kiçik və orta müəssisələr üçün əlverişli olmadığını görüb Tradimum.com layihəsinə start veriblər.

Layihənin ilkin hədəfi bazarı yeni rəqəmsallaşan Türkiyə, Qafqaz, Orta Asiya regionundur. Bununla  yanaşı,  layihənin Latın Amerikası ilə birlikdə Avropada yayılması istiqamətində də artıq fəaliyyətə başlanıb. Saytın gələcəkdə türk dilindən başqa Azərbcaycan, rus, gürcü, qazax, ingilis və ispan dillərində də fəaliyyət göstərməsi nəzərdə tutulub.

Layihənin həmtəsisçisi və rəhbəri Turqut Kərim hazırda Çilidədir. O, Santiaqoda 7 ay ərzində müxtəlif “workshop”lar  təşkil etməyi,  universitetlərdə təqdimatla, Çilidə və Latın Amerikasında baş tutacaq müxtəlif iclaslarda layihəyə tərəfdaşlar toplamağı palanlaşdırır.

Layihə eyni zamanda “Türk Telekom Pilott” Təşəbbüskarlıqları Sürətləndirmə proqramına qəbul edilən səkkiz layihədən biridir.  Həmçinin, TEB(Türkiyə İqtisadiyyat Bankı) layihənin əməkdaşı və dəstəkçilərindəndir.

Qeyd edək ki, “Start-Up Chile” artıq 5 ildir Santiaqo şəhərində fəaliyyət göstərir və birbaşa Çili dövlət tərəfindən maliyələşən bu müsabiqənin əsas məqsədi Çilini Cənubi Amerikanın təşəbbüskarlıq və innovasiya mərkəzinə çevirməkdir.

 Murad Məmmədzadə