MOBİL RABİTƏ

2015-2016-cı illər ərzində 4G şəbəkəsinin getdikcə genişləndirilməsi planlaşdırılır.

Xəbərlər Azercell Telekom MMC-nin təqdim etdiyi 3G və 4G texnologiyalarının inkişafı ilə ilə maraqlanıb.

Mobil operator istifadəçilərin və biznes sahəsində çalışanların bu xidmətlərə olan təlabatı və həmçinin  operatorun bu xidmətlərinin keyfiyyəti və rəqabəti  ilə bağlı suallarımızı cavablandırıb.

Azercell şirkəti  mobil İnternet ilə bağlı mövcud vəziyyət və tendensiya ilə bağlı ətraflı məlumat verib.

-Hazırda Azercell Telekom MMC-də 4G ilə bağlı vəziyyət necədir ? Bu texnologiya indi hansı əraziləri əhatə edir ? 

-Azercell-in təqdim etdiyi 4G xidməti  hazırda  Bakı və Abşeron yarımadasını əhatə edir.  Gələcəkdə biz bu xidməti ölkənin digər əraziləri boyu da genişləndirməyi düşünürük.  

-Ümumiyyətlə , 3G və 4G üzrə ölkənin neçə faizini əhatə edirsiniz ?

-Qeyd edək ki, Azercell-in 2G/3G/4G şəbəkəsi işğal olunmuş əraziləri çıxmaq şərti ilə ümumilikdə ölkənin 99 faizini əhatə edir. Təkcə 3G şəbəkəmiz ölkənin 60 faizə  qədər ərazisini, 4G isə Abşeron yarımadasını və Bakı şəhərini əhatə edir. 

-4G Baza  stansiyalarınızın sayı artıbmı ?  Yəni,  ötən illə müqayisədə 4G stansiyalar nə qədər artıb ? 4G şəbəkənizi genişləndirirsinizmi ?

-Bu gün Azercell-in Bakını və Abşeron yarımadasını 4G şəbəkəsi ilə təmin edən 257 stansiyası var. Azercell regionda ilk və ən böyük LTE (4G) şəbəkəsinə sahibdir.  Qeyd edək ki, hazırda istifadəçilər arasında 4G ilə müqayisədə 3G xidmətlərinə tələbat daha yüksəkdir. Bunu nəzər alaraq, təkcə 2014-cü il ərzində 3G şəbəkəsinin tutumunu Bakıda 92 faiz,  ölkə üzrə isə 48 faiz gücləndirdik. 2015-2016-cı illər ərzində 4G şəbəkəsinin getdikcə genişləndirilməsi planlaşdırılır.

-Şəbəkəni necə genişləndirirsiniz ? Ümumiyyətlə, 4G-yə olan tələbatı necə müəyyən edirsiniz ?

-Azercell şirkətinin uyğun departamentləri tərəfindən bazarın tələbatına dair araşdırmalar aparılır və nəticələrə əsasən planlama baş verir. Müəyyən olunmuş tələbatın qarşılanması üçün nəzərdə tutulmuş ərazilərdə uyğun tədbirlər planı həyata keçiririk.

-4G fəaliyyətə başlayandan sonra trafik artımında fərq yaranıbmı ? Abonentlər daha çox trafik əldə etməyə meyllidirlərmi ? 4G bazarında rəqabət varmı və  daha gəlirli olan korporativ müştərilər uğrunda mübarizə gedirmi ?

-Hesablamalarımıza görə, abunəçi 4G şəbəkəsinə keçdikdən sonra ortalama 150-200 faiz  daha çox internet trafikdən istifadə edir. Bu da 4G bazarında rəqabətin artacağı ilə bağlı yaranan ehtimalları artırır.

-Hazırda Sizdə 3G və 4G  şəbəkənizdə mobil İnternetin  orta sürəti necədir?

-3G şəbəkəsində 2.2 Mbp/s,  4G şəbəkəsində isə 90-100 Mbp/s-dir.

-Bir müddət  öncə RYTN tərəfindən mobil İnternetin də keyfiyyətinin monitorinqinin aparıldığı bildirilirdi.  Bu monitorinqlərin nəticəsi olaraq sizə hər hansı tövsiyyələr və ya iradlar bildirilibmi?

-Rabitə və Yüksək Texnologiyalar nazirliyinin apardığı araşdırmaların nəticələrinə əsasən bildirildi ki, Azercell ölkədə ən yüksək sürətli mobil İnternet xidmətləri təqdim edir. Azercell bundan sonra da öz şəbəkəsi və xidmətlərin təkmilləşdirərərək, abunəçilərinə rahat və sərfəli mobil rabitə təqdim etməyi davam etdirəcək.

-Mobil internetin keyfiyyətinin  yüksəldilməsi üçün modernləşdrimə aparılırmı, baza stansiyalarının buraxılış gücü artırılırmı?

-Azercell şirkətinin təqdim etdiyi Mobil internetin keyfiyyətinin və sürətinin artırılması üzərində tərəfimizdən daim xüsusi tədbirlər həyata keçirilir. Yuxarıda qeyd etdiyiniz kimi, ötən il ərzində Azercell-in 3G şəbəkəsinin tutumu ölkədə 48 faiz,  Bakıda isə 92 faiz gücləndirildi. Buna həm yeni stansiyaların, həm də, əsasən mövcud  stansiyalarda  2-ci daşıyıcıların quraşdırılması sayəsində nail olduq. 2014-cü ildə şəbəkəmizdə məlumat ötürülməsi 60 faiz artdı. Ümumiyyətlə isə, son 2 il ərzində, Azercell-in şəbəkəsini ölkə üzrə 25 faiz gücləndirmişik. 

-Mobil İnternetin qiymətində endirim gözlənilirmi? 

- Ötən il ərzində müxtəlif yeni təkliflər və kampaniyalar istifadəyə verərək mobil İnternetin 1GB qiymətini 30 faiz endirdik. Abunəçilərimizə bazarda ən ucuz İnternet paketi təqdim etdik: 0,25AZN= günlük 50MB İnternet. Həmçinin, GəncOl, Hədsiz kimi tarif paketlərimizdə həcm, keyfiyyət və qiymət baxımından unikal Mobil internet təklifləri mövcuddur.

-4G üzərindən  hansısa yeni xidmətləri təqdim etməyi düşünürsünüzmü?

-4G texnologiyasının tətbiqi və genişləndirilməsi daha geniş çeşidli, daha böyük sürətlə keyfiyyətli xidmətlərin göstərilməsinə imkan yaradacaq. 4G-nin təmin etdiyi yüksəksürətli İnternet xüsusilə də cihazdan-cihaza, M2M xidmətlərinin inkişafına təkan verir. Məlumatların ölçülməsinə, toplanılmasına və ötürülməsinə imkan verən bu texnologiya bank, nəqliyyat, təhlükəsizlik, səhiyyə, kommunal xidmətlər və s. sahələrdə istifadə olunur. Azercell-in simkartları bir çox yerdə istifadə olunur- Azərİşıq, AzərQaz, AzərSu sayğaclarında, Bakı metropoliteninin keçidlərində, Asan İmza xidmətlərində, tıxacların idarə edilməsi sistemlərində və s. Son Bakutel sərgisində Azercell ictimaiyyətə M2M əsasında çalışan mobil Sağlamlıq, valideyn nəzarəti kimi yeniliklər nümayiş etdirdi. Hazırda bu istiqamətdə adları qeyd olunan və digər layihələr üzərində işləyirik, növbəti aylarda bu barədə ictimaiyyətə ətraflı məlumat təqdim edəcəyik.

Xeberler.az