Azərkosmos ISNET təşkilatının mükafatına layiq görülüb

06-04-2022 / 17:06

Bakı, 6 aprel 2022 – Rəqəmsal İnkişaf və Nəqliyyat Nazirliyinin tabeliyində fəaliyyət Azərbaycan Respublikasının Kosmik Agentliyi – Azərkosmosun nümayəndə heyəti Pakistanın paytaxtı İslamabad şəhərində İslam Ölkələri Arası Kosmik Elmlər və Texnologiyalar Təşkilatının (ISNET) kosmos üzrə beynəlxalq konfransında iştirak edib.

Xeberler.az bildirir ki, tədbir çərçivəsində Azərkosmos ISNET təşkilatının “Kosmik elm və texnologiya vasitəsilə dayanıqlı inkişaf məqsədlərinin həyata keçirilməsi proqramı” üzrə keçirilən müsabiqənin qalibi olaraq mükafata layiq görülüb .

Müsabiqədə Azərkosmosun Coğrafi informasiya sistemləri mərkəzinin hazırladığı layihə təqdim olunub. Layihə Azərbaycan Respublikası üzrə 20 il (2000-2020) ərzində quraqlıq və səhralaşmaya məruz qalmış ərazilərin peyk təsvirləri əsasında monitorinqini əks etdirir. Layihənin nəticələri Birləşmiş Millətlər Təşkilatının “Dayanıqlı inkişaf məqsədləri”nin 13, 15 və 17-ci bəndlərinə müvafiq olaraq qlobal əməkdaşlığı canlandırmaq hədəfinə uyğunlaşdırılıb.

Səfər müddətində nümayəndə heyəti “İslam Əməkdaşlıq Təşkilatına üzv ölkələr arasında kosmik təhsil və maarifləndirmənin təşviqi: ISNET-ə üzv qurumlar arasında təcrübə mübadiləsi” üzrə keçirilən panel görüşlərində iştirak edib. Görüşlərdə tədbir iştirakçılarına Azərbaycanın kosmik sahəsi, peykləri və onların biznes fəaliyyəti, bu sahə üzrə qurulmuş beynəlxalq əlaqələr, o cümlədən Azərkosmosun kosmik sahədə həyata keçirdiyi elm və təhsil layihələri haqqında təqdimat nümayiş olunub.

Daha sonra İSNET təşkilatına üzv qurumlar arasında Azərbaycanın kosmik ölkə olaraq tanıdılması məqsədilə geniş təbliğat-təşviqat işləri aparılıb və tədbir iştirakçıları 2023-cü ildə Bakıda keçiriləcək Beynəlxalq Astronavtika Konqresinə dəvət olunublar.

 

Azərkosmos haqqında

Cənubi Qafqazda ilk və yeganə peyk operatoru olan Azərkosmos telekommunikasiya və coğrafi kəşfiyyat sahələri üçün yüksək keyfiyyətli peyk xidmətləri təqdim edir. 2013-cü ilin fevral ayında orbitə buraxılan və Azərkosmos tərəfindən idarə edilən “Azerspace-1” peyki 46° şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir. Ən azı 15 il müddətində orbitdə fəaliyyət göstərəcək peykin faydalı yükü 36 transponderdən ibarətdir: C diapazonda 24, Ku diapazonda 12 transponder. 2014-cü ilin dekabr ayından etibarən Azərkosmos sayca ikinci, təyinatına görə yüksək ayırdetməli (1,5 m ayırdetmə) Yer səthinin məsafədən müşahidə peyki olan “Azersky”ın idarəçiliyini təhvil almış və bununla da geoinformasiya xidmətləri də daxil olmaqla Yer səthinin məsafədən müşahidəsinin kommersiya fəaliyyətinə başlamışdır. Şirkətin strateji inkişaf planlarına əhatə dairəsinin və xidmətlər spektrinin genişləndirilməsi daxildir. Bu məqsədlə “Azərkosmos” 2018-ci ildə ikinci telekommunikasiya peyki “Azerspace-2”ni 45° şərq uzunluğu orbital mövqeyinə çıxarıb. Daha ətraflı məlumatı www.azercosmos.com  internet səhifəsindən ala bilərsiniz.


ŞƏRHLƏR






sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.