TƏDBİRLƏR

Bu gün Park İnn otelində türkiyəli professor Ali Kutvanın  Azərbaycan dilində nəşr edilmiş kitabının təqdimat mərasimi keçirilib.

Xeberler.az-ın məlumatına görə, “İdarəetmə etikası” adlı kitabın təqdimatında xüsusən turizm, İT sektorunun nümayəndələri və universitet tələbələri iştirak edib.

Kitabın müəllifi Ali Kutvan deyib ki, müasir dövrdə istər menecment, istərsə də ictimai sahələrdə ən aktual probelemlərdən biri etikadır.

Ali Kutvan vurğulayıb ki, hazırda dünyada şirkətlər yalnız əməkdaşlıq etdiyi, ortaq olduğu qurumlar yox, həmçinin bütün işçilərinə, dövlətə, müştərilərinə və digər ətrafına qarşı böyük məsuliyyət daşıyır. Onun sözlərinə görə, bütün bu məqamlarda düzgün qərar vermək idarəetmə baxımından yüksək etik mədəniyyəti tələb edir.

Professor qeyd edib ki, yeni kitab xüsusilə elmi, tədris sahəsində, həmçinin iqtisadiyyat ilə çalışan bütün qərar vermə məsuliyyətinə sahib insanlar üçün faydalı olacaq.

Daha sonra tədbir iştirakçıları kitabın önəmindən danışaraq hazırda etika ilə bağlı belə bir vəsaitə ehtiyac olduğunu vurğulayıb.

Qeyd edək ki, “İdarəetmə etikası” adlı kitabın qiyməti 10 AZN-dir.

Ali Kutvan bir müddət Türkiyənin KoçSistem şirkətinin Azərbaycan  direktoru vəzifəsini icra edib.

A.Kutvan hazırda Prezident yanında Dövlət İdarəçilik Akademiyasının qonaq professoru, Kutvan Project Groub sədridir. Bununla yanaşı, bir neçə şirkət və startaplara idarəçilik, professional effektivlik mövzularında məsləhət verir.

Məltəm Talıbzadə