RƏQƏMSAL DÜNYA

“1990-cı ildən bu günə kimi jurnalistikaya nəzər salsaq görərik ki, bu sahədə ciddi faktlar açılır, həqiqi jurnalistika meydana çıxıb. Jurnalistikanın inkişafı dilimizə çoxlu terminlər gətirir. Bütün bunları nəzərə alaraq “Jurnalistika terminləri” adlı kitab nəşr etdirməyə qərar vermişik”.

Bunu Xeberler.az-a Azərbaycan Milli Elmlər Akademiyası (AMEA) Nəsimi adına Dilçilik İnstitutunun Monitorinq şöbəsinin müdiri, professor Qulu Məhərrəmli terminologiyanın inkişafı istiqamətində görülən işlərdən danışarkən deyib.

Onun sözlərinə görə, kitab nəşr olunduqdan sonra onlayn versiyasını da internetdən əldə etmək mümkün olacaq.

Qulu Məhərrəmli qeyd edib ki, internetin gəlişi ilə dilimizdə bəzi alınma sözlər meydana çıxıb. O, Xeberler.az-a vurğulayıb ki, dilimizin terminoloji bazasının yaranmağı çox vacibdir.

“Bu gün jurnalistikada bilik, düşüncə niyə aşağıdır? Çünki biz anlayışların çoxunu bilmirik. Anlayışlar istənilən sahənin əlifbasıdır”.

Bu məsələ ilə məşğul olmaq üçün təxminən 4-5 nəfərlik bir qrupun təşkil edildiyini bildirən şöbə müdiri tərtibçilərdən birinin özünün olduğunu diqqətə çatdırıb:

“Jurnalistika terminləri” adlı kitabın tərtibçilərindən biri mənəm. Mənimlə bərabər bu prosesin həyata keçirilməsi istiqamətində Azərbaycan Jurnalistlər Birliyinin sədri Elçin Şıxlı, Bakı Dövlət Universitetinin (BDU) kafedra müdiri Aynur Kərimli və jurnalist Arif Əliyev də yaxından iştirak edir”.

Ruhəngiz Muradova