Beynəlxalq informatika olimpiadasında uğurlarımız azalan istiqamətdədir.
Ötən həftə Macarıstanda 35-ci Beynəlxalq İnformatika Olimpiadası (İOİ) başa çatıb.
Azərbaycandan 4 iştirakçı bu nüfuzlu olimpiadaya qatılıb. Nəticələrimiz əvvəlki illərə nisbətən zəif olub.
Cəmi bir şagirdimiz, Fizika, Riyaziyyat və İnformatika təmayüllü liseydən Fuad Qarayev bürünc medal qazanıb. İki məktəblimiz isə həvəsləndirici yerlər qazanıblar.
Məktəblilərimizi, valideynlərini, müəllimlərini və məktəb rəhbərliyini , komanda rəhbərliyini təbrik edirik.
Burada həm də diqqət çəkən məqam odur ki, bu nüfuzlu olimpiadada nəticələrimiz getdikcə pisləşir :
2020 - 3 bürünc
2021 - 2 bürünc
2022 - 1 bürünc
2023 - 1 bürünc
Həm də, maraqlıdlr ki, İOİ Təşkilat Komitəsi də, bizim bu ilki qəbulda olduğu kimi, keçid ballarını azaldıb.
Əvvəllər bürünc 53.30%-lə verilirdi, bu il isə 50.29% nəticə göstərənlər də bürünc əldə edib. Maraqlıdır ki, hesabatlara görə və olimpiadaya məsul şəxslərin açıqlamalarına görə Nazirliyin olimpiada hazırlığına ayırdığı resurslar yetərincədir.
Onda nə üçün situasiya belə olmalıdır?
Yeri gəlmişkən, olimpiada nəticələrindən görsənir ki, 2015-dən bu yarışlara qatılan Özbəkistan ilk dəfə olaraq 2 bürünc qazanıb. Düşünmək olar ki, səbəb də orada İKT-yə son illər diqqətin artması və hazırlıq işlərinin düzgün təşkil olunmasıdır.
Ermənistan 3 bürünc əldə edib bu yarışdan. Gürcüstan isə 1 gümüş, 3 bürüc qazanıb.
Düşünürəm ki, ETN və Milli komandanı olimpiadaya hazırlayan komanda daha ciddi işlər aparmalıdır. Siyahıdan görsənir ki, yarışa qatılanlar da xeyli potensialı olan, təcrübəsi olan uşaqlardı. Belə görünür ki məsul şəxslər hazırlıq işlərini düzgün qurulmalıdırlar. İnformatika təmayüllü siniflər üçün proqramlaşdırma və alqoritmlərlə bağlı xüsusi fənlər, kitablar, onlayn resurslar hazırlanmalıdır.
Osman Gündüz,
Azərbaycan İnternet Forumunun prezidenti, ekspert
