"Azərbaycan məktəbliləri Beynəlxalq İnformatika Olimpiadasında tarix yazdı – 22 ildən sonra ilk gümüş medal".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Qeyd edək ki, Boliviyanın Sukre şəhərində keçirilən 37-ci Beynəlxalq İnformatika Olimpiadasında (IOI 2025) Azərbaycan məktəbliləri ölkə tarixində ən yüksək nəticəyə imza atıblar. Komandamız 1 gümüş, 2 bürünc medal və 1 həvəsləndirici mükafat qazanaraq həm fərdi, həm də ümumi nəticələr baxımından rekord əldə edib.
Osman Gündüz bildirib ki, Azərbaycan bu olimpiadada sonuncu dəfə 22 il əvvəl, 2003-cü ildə gümüş medal qazanmışdı. İndiyədək qızıl medalımız olmayıb. Ayxan Dəmirli ötən il də (2024) bürünc medal qazanmışdı:
"Bu Olimpiadanın, həmçinin Beynəlxalq Riyaziyyat Olimpiadasının nüfuzu, səviyyəsi elədir ki, orada həvəsləndirici mükafat da müstəsna rol oynayır və dərhal da bu cür yeniyetmələri gələcək mütəxəssis olaraq ələ keçirmək istəyən maraqlı tərəflərin diqqətini cəlb edir.
Azərbaycan komandası bu il keçmiş sovet respublikaları arasında yalnız Ukrayna və Qazaxıstandan sonra 3-cü yeri tutub. Bu, ölkəmiz üçün böyük nailiyyətdir və olimpiadaya hazırlıq işinin səviyyəsinin göstəricisidir.
Bununla belə, olimpiadanın statistikasından görsənir ki, medal sayına görə Azərbaycan komandasının görəcəyi işlər hələ çoxdur".
Son 6 ildə IOI nəticələrimiz belə olub:
2020 – 3 bürünc
2021 – 2 bürünc
2022 – 1 bürünc
2023 – 1 bürünc
2024 – 1 bürünc
2025 – 1 gümüş, 2 bürünc
Digər ölkələrin IOI 2025 nəticələri:
Ermənistan – 4 bürünc
Gürcüstan – 1 bürünc
Özbəkistan – 1 gümüş (İLK DƏFƏ), 1 bürünc
Qazaxıstan – 3 gümüş, 1 bürünc
Qırğızıstan – 2 bürünc
Türkiyə – 1 gümüş, 2 bürünc
Ekspertin sözlərinə görə, bu uğur eyni zamanda onu göstərir ki, Elm və Təhsil Nazirliyi olimpiadalara hazırlığa son illərdə ciddi diqqət yetirir. Ayrılan güclü mütəxəssislər, resurslar və son zamanlarda müşahidə olunan yeni metodiki vəsaitlər bu nəticədə əhəmiyyətli rol oynayıb:
"Olimpiadaya hazırlıq mərkəzinin fəaliyyəti xüsusi təqdirəlayiqdir".
