BTRİB-də özəl provayderlərin, AİF və İnternet Cəmiyyətinin birgə görüşü keçirilib

17-02-2015 / 15:21

Bu gün Bakı Telefon Rabitəsi İstehsalat Birliyində ( BTRİB) özəl provayderlərin, Azərbaycan İnternet Forumu və İnternet Cəmiyyətinin iştirakı ilə toplantı keçirilib. Toplantıda Bakı şəhərinin bütün qovşaq rəhbərləri də iştirak edib

Xəbərlər-in məlumatına görə, toplantıda Bakı şəhərində İnternetin inkişafı məsələləri müzakirə edilib.

Tədbiri giriş sözü ilə BTRİB -in Baş direktoru Beytulla Hüseynov açaraq görüşün məqsədi haqqında qısa məlumat verib. O, son dövrlərdə Bakı şəhərində İnternetin xeyli inkişaf etdiyini və bu istiqamətdə bir sıra addımların atıldığını vurğulayıb. Kifayət qədər geniş infrastruktura malik olan BTRİB-də İnternetin inkişafı istiqamətində müəyyən çətinliklərin də olduğunu qeyd edib.

O, son dövrlərdə rabitə və yüksək texnologiyalar nazirinin çıxışında BTRİB ünvanına da tənqidlərin səsləndiyini diqqətə çatdırıb. Qeyd olunan nöqsanların aradan qaldırılması və özəl provayderlərin problemlərinin müzakirəsi üçün aidiyyatı qurumlarla birgə belə bir görüşün keçirilməsinin zəruri olduğunu qeyd edib. 

Baş direktor özəl provayderlərə BTRİB infrastrukturundan istifadə məqsədilə normal şəraitin yaradılması üçün xeyli addımların atıldığını bidirib.

B. Hüseynov BTRİB-in infrastrukturunun saxlanılması və inkişafı sahəsində, yeni yaşayış massivlərində rabitə infarstrukturun qurulmasında, digər operatorlara məxsus kabel-kanalizasiya qurğularından istifadə sahəsində bir sıra çətinliklərin də olduğunu diqqətə çatdırıb.

Baş direktor özəl Provayderlərə kömək məqsədilə BTRİB tərəfindən yaradılan şəraitin daha da inkişaf etdiriləcəyini bildirib. O bəzi tariflərə yenidən baxılmasının da mümkün olacağını bildirib. O, özəl provayderlərə münasibətin daha da yaxşılaşdırılacağını, ayrı-seçkilik hallarının qarşısını almaq üçün ciddi tədbirlər görüləcəyini diqqətə çatdırıb.

Baş direktor özəl provayderləri daha keyfiyyətli İnternet xidməti göstərməyə, yaradılan imkanlardan daha effektiv istifadə etməyə çağırıb.

Rabitə və Yüksək Texnologiyalar nazirliyinin sektor müdiri Kamal Məmmədov son dövrlərdə özəl provayderlərlə əlaqələrin gücləndirilməsi, problemlərin aradan qaldırılması istiqamətində xeyli uğurların əldə edildiyini diqqətə çatdırıb. O, fiber-optik infrastrukturun inkişafının Nazirlik üçün prioritet olduğunu qeyd edib.

K. Məmmədov da çıxışında İnternet xidmətlərinin keyfiyyətlərində problemlər olduğunu vurğulayıb . Müqavilələrin tərtib edilməsində müəyyən qüsurların olduğunu bildirib. O, çıxışında kabel-kanalizasiya qurğuların istifadəsi ilə bağlı mövcud tariflərə yenidən baxılmasının mümkün ola biləcəyini də qeyd edib.

Daha sonra çıxış edən Azərbaycan İnternet Forumunun prezidenti Osman Gündüz bildirib ki, ölkədə hazırda optik infrastrukturun inkişafına ciddi ehtiyac var. O, keyfiyyətli genişzolaqlı İnternet infrastrukturun inkişafı üçün BTRİB tərəfindən müəyyən olunan tariflərə yenidən baxılmasının vacib olduğunu diqqətə çatdırıb. O, həmçinin nazirin çıxışında qeyd olunan “doğma provayder” məsələsinə xüsusi diqqət yetirməyin vacib olduğu bildirərək, BTRİB tərəfindən özəl perovayderlərə qarşı daha münbit şəraitin yaradılmasının, özəl və dövlət provayderin start vəziyyətlərinin daha da yaxın olmasının, bütün provayderlərə eyni münasibət göstərilməsinin vacib olduğunu vurğulayıb.

Osman Gündüz özəl provayderlərin optik infrastrukturun qurulmasında iştirakı üçün BTRİB rəhbərliyi tərəfindən ciddi təminatlar yaradılmasının vacibliyini diqqətə çatdırıb. O, xüsusilə hazırda keyfiyyətli İnternet məsələsində problemlərin olduğunu bildirib və bu problemin həlli üçün kompleks tədbirlərin görülməsinin vacidbliyini qeyd edib.

Görüşdə BTRİB-in texniki direktoru Xankişi Kişiyev, Azərbaycan Internet Cəmiyyətinin sədri Qalib Qurbanov, Connect, Avirtel, Megatelekom, Smart Systems provayderlərinin nümayəndələri və digərləri çıxış ediblər. Onlar son dövrlərdə İnternetin xeyli inkişaf etdiyini diqqətə çatdıraraq mövcud problemlərin müzakirəsi baxımından görüşün əhəmiyyətli olduğunu bildiriblər. Çıxış edənlər problemlərin aradan qaldırılması istiqamətində təkliflərini səsləndiriblər.

Tədbirə yekun vuran BTRİB rəhbəri Beytulla Hüseynov görüşün xeyli əhəmiyyətli olduğunu diqqətə çəkib və qeyd olunanların nəzərə alınması üçün tədbirlər görüləcəyini bildirib. 

O, gələcəkdə də bu cür görüşlərin keçirilməsinin faydalı olacağını diqqətə çatdırıb.

Xəbərlər

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.