PROQRAMLAR

Xeberler.az olaraq  oxucularımız  üçün faydalı və maraqlı ola biləcək tətbiqlər barədə ətraflı və anlaşılqlı yazıları təqdim edirik.

Bu dəfə ödənişsiz təhsil tətbiqi iTunes haqqında məlumat verəcəyik.

Apple şirkəti iOS-a sahib mobil cihazları üçün bir sıra tətbiqlər hazırlayıb ki, bunlardan ən vaciblərindən biri də iTunes U tətbiqidir. Ödənişsiz təhsil tətbiqi olan iTunes U-nu əldə etmək üçün iOS 8.3 və ya daha yüksək sistemə sahib iPhone, iPad və iPod-ların olması kifayətdir. Bu tətbiqdən iki istiqamətdə istifadə etmək mümkündür.

Siz dünyanın aparıcı təhsil mərkəzlərinin hazırladığı ödənişsiz kurslarda iştirak edə bilərsiniz, həmçinin eyni zamanda  müəllim və təlimçi kimi kurslar hazırlaya, bunları iştirakçılarınızla Apple mobil cihazları vasitəsilə paylaşa, tapşırıqlar və qiymətləndirmələr verə bilərsiniz.

Hələlik sadəcə burada fərdi qaydada kursları tapıb onlara üzv olmağın və iştirak etməyin yollarını göstərəcəyik. Təlimçi kimi istifadə etməyin yolları üçün əlavə material hazırlayacağıq. Tətbiqi açdığımız zaman qarşımıza bu görüntü çıxır. 

Mövcud kursların və kolleksiyaların kataloqunu görmək üçün ortadakı “View Catalogue” və ya aşağıdakı ulduz işarəsi ilə göstərilmiş “Featured” düyməsini seçmək lazımdır. Sol üst tərəfdəki “+” işarəsini seçdikdə yaradılmış özəl kurslara xüsusi şifrə ilə daxil ola və ya yeni kurslar əlavə edə bilərsiniz (yalnız iPadlərdə). “Featured” menyusunda qarşımıza kurslar və kolleksiyalar çıxır. İlkin olaraq bütün kateqoriyalar üzrə nəticələr görünsə də, yuxarıdakı “More” düyməsinə klikləyib kateqoriyalar arasından lazımi mövzu üzrə seçə bilərik. Qeyd edək ki, burada Dünyanın ən nüfuzlu universitetlərinin də kursları mövcuddur. Kurslar ingilis, ispan, italyan, portuqal, alman, çin, yapon və s. dillərində mövcuddur.

 “Top Charts” menyusunda ən çox müraciət edilən kursları və kolleksiyaları tapa bilərsiniz, sol-üst tərəfdəki “All Categories” menyusuna  daxil olaraq lazımi kateqoriyalarla da məhdudlaşdıra bilərsiniz. :

Siz hər hansısa konkret mövzunu axtarırsınızsa, bunu yuxarıdakı axtarış bölməsinə yazaraq axtara bilərsiniz

Sizə lazım olan kursu tapdıqdan sonra üstünə basaraq detalları, haqqındakı rəyləri və s. görə bilərsiniz. Daxil olmaq üçün “Subscribe” düyməsini seçmək basmaq kifayətdir.

 İştirak etdiyiniz kursları aşağıdalı “My Courses” bölməsində görə bilərsiniz:

Buradan kursa daxil olduqda kurs haqqında ümumi məlumatı əks etdirən məlumatı görürsünüz. Sol tərəfdəki “Instructor” bölməsində kursu hazırlayan qurum və ya şəxs haqqında məlumat, “Outline” bölməsində isə planı mövcuddur.

Aşağıdakı “Posts” bölməsində kurs haqqında instruktorunun yayımladığı hər şeyi-tapşırıqları, izahları, dərs materialları və s. görmək mümkündür.

Hər hansısa posta daxil olaraq mövzunun nə olması, nələrdə danışılacağı, yerinə yetirilməli olunan tapşırıqlar və s. kimi məlumatlar əldə olunur.

Sonda isə “Materials” bölməsində Siz kursda istifadə edilən mətnləri, audio və video faylları yükləyə bilərsiniz:

Əlbəttə, müxətlif kursların  və kolleksiyaların quruluşlarında kiçik fərqliliklər ola bilər-bu tərtibatı aparan instruktordan asılıdır, lakin ümumilikdə iTunes U öz biliklərini genişlənidirib təkmiləşdirmək istəyən şəxslər üçün çox gözəl tətbiqdir.

Murad Məmməzadə