AZNET

Bir çox insan smartfonla fotoşəkil çəkməyi sevir, hətta smartfonlardan peşəkar çəkilişlər üçün istifadə edənlər də var. Şəkli çəkdikdən sonra bir çox halda onu redaktə etməyə ehtiyac yaranır.

Xeberler.az olaraq bu ehtiyacı qarşılamağa iddialı olan Enlight-smartfonlar üçün geniş funksiyalı fotoredaktor tətbiqini  təhlil edəcəyik.

Tətbiq hələlik sadəcə iOS platformasında həm iPhone, həm də iPadlər üçün mövcuddur. Şirkət hələ Android versiyası üçün mövcud planların olmadığını bildirir.

Tətbiq olduqca sadə və rahat interfeysə sahibdir. Aşağıda “Camera Roll” bölməsində şəkillərin üzərində barmağınızı sağa-sola sürüşdürməklə sizə lazım olan şəkli tapa bilərsiniz. Əgər bütün şəkilləri görmək istəyirsinizsə, bunun üçün bölmənin üstündə yerləşən bənövşəyi xətti yuxarı sürüşdürmək kifayət edir.

Lazımi şəkli seçdikdən sonra sağ-üst tərəfdəki menyunu seçərək alətlər bölməsini görə bilirsiniz. Burada siz şəklin ölçülərini dəyişə və ya şəkli kəsə, ümumi parlaqlıq, kontrast xüsusiyyətlərini seçə, şəkilə müxtəlif filtirlər tətbiq edə, başqa şəkillərlə birləşdirə, üzərində şəkillər çəkə və ya yazılar yaza, müxtəlif kollajlar düzəldə və ya çərçivələrə yerləşdirə bilərsiniz. Tətbiq mobil fotoredaktor kimi olduqca geniş funksiyalara sahibdir. Bunlardan bəzilərini tətbiq edərək həm necə edildiyini, həm də nəticələrini göstərəcəyik.

Məsələn “İmage” bölməsini seçdikdə onun alt-bölmələrini görünür. Biz buradan “Adjust” alt-bölməsini seçirik.

“Adjust” bölməsinə daxil olduqdan sonra digər bölmələrdə olduğu kimi aşağıda “Presets”, “Tools” və “Mask” bölmələri açılır. “Presets” bölməsində əvvəlcədən təyin olunmuş müxtəlif sazlamaları seçirsiniz. “Tools” bölməsində isə bütün sazlamaları fərdi qaydada bir-bir özünüz tənzimləyirsiniz. “Mask” bölməsi isə təyin olunmuş sazlamalar üzrə bəzi düzəlişləri etmək üçündür.

“Presets” bölməsində “Crisp” sazlamasını seçirik. Göründüyü kimi burada seçilən sazlamanın üzərində rəqəmlər görünür ki, bu rəqəmlər sazlamalanın təsirlilik faizi göstəricisidir. Bunu azaldıb artırmaq üçün barmağınızı ekranın üzərində sola-sağa sürüşdürməyiniz kifayətdir.

Əsas menyudan “Filters” bölməsini seçirik. Buradan istədiyimiz filtri seçərək eyni qaydada onu təsirliliyini nizamlayırıq.  Aşağıdakı filtrlər bölməsinin üzərində, sağ-alt düyməsini seçdikdə şəklin filtrsiz görüntüsünü görərək rahatlıqla müqayisə apara bilirik.

Sol-yuxarıda yerləşən loqonu seçdikdə belə bir tənzimləmə bölməsi açılır. Bu bölmədə Siz redaktə edilmiş şəkilləri hansı formatlarda və hansı həcmdə yadda saxlanılmasını seçə bilirsiniz. Qeyd edək ki, tətbiq yalnız 16 meqapikselə qədər fotoşəkilləri qəbul edir ki, bu nəinki smartfonlarla çəkilmiş şəkillər, hətta bir sıra professional kamera ilə çəkilmiş şəkillərin də redaktəsinə imkan verir.

Şəklin redaktəsini tamamladıqdan sonra yuxarıda yerləşən paylaşma bölməsinə daxil oluruq. Burada “Save Photo”nu seçərək şəkli yaddaşda saxlaya, əgər redaktəni tamam bitirməmisinizsə, “Save Session”ı seçərək etdiyiniz düzəlişləri tətbiqin yaddaşında saxlaya bilərsiniz. Həmçinin şəklinizi buradan bir-başa sosial media da paylaşa bilərsiniz. Müqayisə üçün şəklin redaktədən əvvəlki və sonraki vəziyyətinə göstərəcəyik.

Fotoşəkil çəkməyə həvəskar olan  və bu şəkillər üzərində professional redaktə edə bilmək arzusundan olan şəxslər bu tətbiqi 3,99$ ödəməklə AppStore-dan yükləyə bilərlər.

Murad Məmmədzadə