Xatırladıram ki, ötən il Azərbaycanda 11 milyon manat nizamnamə kapitalına malik "Caucasus Ventures" fondu yaradılıb.
Bunun 5 milyon manatını dövlətin adından çıxış edən RİNN, 5 milyon manatını PAŞA Holdinq,1 milyon manatını isə 6 kiçik sahibkar təmin edib.
Fond yalnız Azərbaycanda deyil, bütün regionda və qlobalda olan startaplara da yatırım ediləcəyini bildirmişdi.
Görəsən bu vençur fondu indiyədək neçə startapa yatırım edib?
Təəssüf ki, hələlik bununla bağlı hər hansı rəsmi açıqlamaya rast gəlmək mümkün deyil.
Fondun rəhbərliyi və İRİA bununla bağlı indiyədək hər hansı açıqlama verməyiblər. Amma əldə etdiyimiz məlumatlara görə "Caucasus Ventures" fondu indiyədək təxminən 5 startapın hər birinə 50 min dollar civarında yatırımlar edib.
Bununla belə , müəyyən prosedurlar başa çatmadığından Fond bu haqda açıqlama vermək istəməyib.
Düşünürəm ki, hələlik ölkədə yeganə olan Fondun fəaliyyətinin canlandırılmasına, əlçatanlığın təkmilləşdirilməsinə ehtiyac var. Daha çox dövlət resursları hesabına formalaşan fondun şəffaflığa, informasiya açıqlığına diqqət yetirməsi də doğru olardı.
Eyni zamanda bildiyim qədər, Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyi bu il Azərbaycanda 2-ci vençur fondunun da yaradılacağını açıqlamışdı.
Hansı ki, bu Fond ilkin inkişaf mərhələsində olan startaplar üçün daha çox maliyyə vəsaitinə əlçatanlığı təmin etməliydi.
Hələlik bu Fonddan da bir xəbər yoxdur.
Müşahidələr, aparılan təhlillər göstərir ki, ölkəmizdə startapların maliyyə resurslarına əlçatanlığı, regional və qlobal bazarla çıxışları sahəsində görüləcək xeyli işlər var.
Düşünürəm ki, İRİA digər əlaqədar qurumlarla birgə ekosistemin inkişafı üçün münbit şəraitin yaradılması istiqamətində səylərini gücləndirməlidir.
Osman Gündüz
