"Bir neçə ay öncə Azərbaycanın ilk vençur fondunun – Caucasus Venturesin bank hesablarının bağlanılması haqqında yazmışdım".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, Mərkəzi Bank müəyyən edib ki, Azərbaycan əsaslı, lakin xaricdə qeydiyyatdan keçən startaplarımıza Fondun yatırımında qanunvericiliyin tələbləri pozulubmuş:
"Yəni Fondun xaricdə qərarlaşan startaplarımıza investisiya yatırımı məqsədilə etdiyi valyuta ödənişləri “Azərbaycan Respublikasının rezidentlərinin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaların”nın hansısa bəndinə düz gəlməyib. Buna görə də, dövlətin dəstəyilə yaradılan cəmi bircə fondumuz vardı ki, o da məhdudiyyətlə üzləşmişdi".
Osman Gündüz bildirib ki, bu məhdudiyyətin aradan qaldırılması ilə bağlı Caucasus Ventures-in təsisçiləri, RİNN, İnnovasiya və Rəqəmsal İnkişaf Agentliyi və “PAŞA Holdinq” Mərkəzi Banka müraciət etmişdilər. Ötən ay Mərkəzi Bank adı çəkilən Qaydalara dəyişikliklə bağlı qərar qəbul edib
"Dəyişikliyə görə, bir Azərbaycan investoru xarici startapa bir il ərzində cəmi 100 000 dollar investisiya yatıra bilər. Bu məbləğdən çox olarsa valyuta üzrə bank hesabları bloklanacaq. Anlaşılmaz və ağlasığmazdır".
Ekspertin sözlərinə görə, son zamanlar açıqlanan qlobal hesabatlarda məhz bu sahədə Azərbaycanda vəziyyətin daha pis olduğu vurğulanırdı. İndi isə investisiya mühiti daha da məhdudlaşdırılıb:
Məsələ ondadır ki, bizim bazarlar çox kiçikdir. Staraplarımız ciddi uğurlar üçün, böyümək üçün regional və qlobal bazarlara çıxmağa, daha böyük investisiyalar üçün xaricdə qeydiyyatdan keçməyə çalışırlar. Belə bir zamanda isə özümüzün az sayda investorlarımızın bu tip startaplarımıza investisiya imkanlarını məhdudlaşdırmaq anlaşılmazdır".
Osman Gündüz qeyd edib ki, 11 milyonluq vəsaiti olan Caucasus Ventures-ə bu vəsaiti yeni Qaydalara uyğun bir startapa yatırmaq üçün 100 il lazımdır:
"Mərkəzi Bank hansı əsasla belə bir məhdudiyyətin qəbul edilməsi haqqında açıqlama verməyib. Bildiyim qədərilə fondun təsisçisi olan İRİA bu məhdudiyyətə ciddi etiraz edib".
Qeyd edək ki, Azərbaycan dünya startap reytinqində 100 ölkə arasında 80-ci yerdə, bir neçə gün öncə açıqlanan Qlobal İnnovasiya İndeksində də 133 ölkə arasında 95-ci yerdədir.
Ekspert ümid edir ki, Prezident Administrasiyasında, hökumətdə qərar qəbul edənlər də bunların fərqindədir.
