SÜNİ İNTELLEKT VƏ DATA

“OpenAI” və “Microsoft” şirkətləri Konnektikutda baş verən qətl-intihar hadisəsi ilə bağlı yeni məhkəmə işində cavabdeh qismində çıxış ediblər, - deyə “Bloomberg” yazır. Qətlə yetirilən qadının ailəsi iddia edir ki, “ChatGPT” kişinin zehni pozuntusuna səbəb olub və onu anasına qarşı zorakılıq etməyə vadar edib.

Xeberler.az “Bloomberg”ə istinadən məlumat verir ki, bununla bağlı Kaliforniya Ali Məhkəməsində iddia qaldırılıb. İddiaçıların sözlərinə görə, 56 yaşlı Steyn-Erik Soelberq bir neçə ay ərzində “ChatGPT” ilə ünsiyyətdə olub və onda izlənildiyi, kiminsə onu öldürməyə cəhd etdiyi barədə fikir yaranıb.

İddiaçılar hesab edirlər ki, bütün bunlar onun 2025-ci ilin avqust ayında 83 yaşlı anasını öldürməsinə, daha sonra isə intihar etməsinə səbəb olub.

Şikayətdə deyilir ki, çatbot guya onun paranoyasını təsdiqləyib, cəfəng ideyalarını gücləndirib və anası da daxil olmaqla yaxınlarını “agent” və ya təhdid kimi təsvir edib. Ailənin sözlərinə görə, bu, faciənin mərkəzi amili olub.

“OpenAI” nümayəndəsi şirkətin iş üzrə materialları nəzərdən keçirəcəyini bildirib. “Microsoft” material hazırlanan zaman vəziyyətlə bağlı heç bir şərh verməyib.

Qeyd edək ki, “OpenAI” daha əvvəl də “ChatGPT”nin yeniyetmələri intihara təhrik etməkdə iştirakına dair məhkəmə iddiaları ilə üzləşib.

İddiaçılar bildirirlər ki, guya Soelberq tərəfindən istifadə edilən “GPT-4o” modeli ağır ruhi xəstəlik əlamətlərini tanımayıb və söhbətə davam edib. Şirkət vurğulayır ki, modellərinin təhlükəsizliyini artırır və ruhi sağlamlıq mövzularına cavabları təkmilləşdirir.

İddiada “OpenAI”in baş direktoru Sem Altmanın adı xüsusi olaraq çəkilir. Bundan əlavə, iddiaçılar hesab edirlər ki, “Microsoft” “GPT-4o”nun tətbiqindən “birbaşa fayda” əldə edib və potensial olaraq təhlükəli modelin istifadəsinə görə məsuliyyət daşıyır.

İddiaya, həmçinin kompensasiya və “OpenAI”dan əlavə təhlükəsizlik tədbirlərinin tətbiqini tələb edən məhkəmə qərarı daxildir.