Azərbaycanın telekommunikasiya və poçt sahəsində tənzimləyici qurumu olan İnformasiya Kommunikasiya Texnologiyaları Agentliyi (İKTA) 2026-cı ilin yanvar–mart ayları üzrə fəaliyyət göstəricilərini açıqlayıb.
Xeberler.az məlumat verir ki, bu barədə Agentlikdən bildirilib.
Hesabat dövründə hüquqi və fiziki şəxslər tərəfindən radio avadanlıqlarının mülki dövriyyəsinə xüsusi icazə alınması məqsədilə ümumilikdə 226 müraciət daxil olub. Bu müraciətlər üzrə 7 694 ədəd müxtəlif marka və model avadanlığa dair qanunvericiliyə uyğun tədbirlər görülüb.
Baxılmış müraciətlər əsasında 2 522 ədəd radio avadanlığının mülki dövriyyəsinə xüsusi icazə verilib. Eyni zamanda, 83 ədəd avadanlıq üzrə qanunvericiliyin tələblərinə uyğun olaraq icazənin verilməsindən imtina edilib və müraciətçilərə səbəblər ətraflı izah olunub.
Bununla yanaşı, 3 müraciət üzrə aidiyyəti qurumların rəylərinin təqdim olunması gözlənilir.
Araşdırmalar nəticəsində müəyyən edilib ki, idxal olunan 5 091 ədəd avadanlığın mülki dövriyyəsi üçün xüsusi icazə tələb olunmur. Bu barədə müraciətçilərə və aidiyyəti qurumlara məlumat verilib.
Həmçinin 3 hüquqi şəxs tərəfindən təqdim olunmuş müraciətlər əsasında aparılan hüquqi və texniki araşdırmalar nəticəsində müxtəlif marka və modellərə aid ümumilikdə 157 ədəd avadanlığa verilmiş xüsusi icazələrin ləğvi barədə qərar qəbul olunub.
Agentlik qeyd edib ki, mülki dövriyyəsi məhdudlaşdırılmış əşyaların dövriyyəsinin tənzimlənməsi istiqamətində inzibati tədbirlər davam etdirilir.
Xatırladılıb ki, 2024-cü ilin mart ayından etibarən İKTA tərəfindən “Radioelektron vasitələrə verilən icazələr” elektron xidməti istifadəyə verilib. Bu xidmət müraciətlərin daha operativ və səmərəli cavablandırılmasına şərait yaradır.
Bundan əlavə, 2026-cı ilin ilk rübündə “Lisenziyalar və icazələr haqqında” qanuna əsasən sürətli poçt xidməti ilə bağlı 50 müraciət üzrə təqdim olunan sənədlər qiymətləndirilib. Nəticədə 45 ünvanda xidmətin göstərilməsinə müsbət rəy verilib, 5 müraciət isə mənfi qiymətləndirilib.
İKTA telekommunikasiya və poçt rabitəsi sahələrinin inkişafı istiqamətində fəaliyyətini qanunvericiliyə uyğun şəkildə davam etdirəcəyini bildirib.
