TEXNOLOGİYA

İsveçrədə iki xəstəxana kvadrokopterlər vasitəsilə bioloji materialların daşınmasını həyata keçirib.

Bioloji nümunələrin, xüsusilə qanın operativ çatdırılması təcili vəziyyətlərdə (məsələn, əməliyyata hazırlıq zamanı analizlərin aparılması üçün) olduqca əhəmiyyətlidir. Çox zaman toplanmış nümunələr avtomobil vasitəsilə daşınır, lakin böyük şəhərlərdə tıxaclarla qarşılaşmaq mümkündür.

Bu isə, materialların daşınmasında ləngimələrə səbəb ola bilər. Buna görə də, hökumət və səhiyyə sahəsi, o cümlədən özəl şirkət nümayəndələri əlçatan və sərfəli alternativlər axtarmağa başlayıblar.

Xeberler.az ict.az-a istinadən məlumat verir ki, İsveçrənin Luqano şəhərinin iki xəstəxanası İsveçrə Poçtunun dəstəyi ilə dronlar vasitəsilə biomaterialın çatdırılması üzrə xidməti reallaşdırıb. Bunun üçün kiçik nəqliyyat kvadrokopteri Matternet istifadə olunub.

Zəruri hallarda müəssisələrin əməkdaşları pilotsuz təyyarəyə nümunələr və ya digər yüngül yüklü konteyner yükləyir və mobil proqramın köməyi ilə çatdırılmanı aktivləşdirirlər. Aparat avtomatik rejimdə göstərilən marşrut üzrə yükü daşıyır.

Hazırda bu dronlar pilot layihəsi çərçivəsində İsveçrə xəstəxanalarında istifadə olunur. Tibbi  kvadrokopter artıq 70-dən çox test uçuşunu həyata keçirib. Sınaqlar müvəffəqiyyətli olarsa, dronlar vasitəsilə bioloji nümunələrin çatdırılması xidməti 2018-ci ildə öz işinə başlayacaq.

Qeyd edək ki, ilk dəfə Avstraliya şirkəti Flirtey ötən ilin mart ayında şəhər daxilində kiçik dronlar vasitəsilə çatdırılmanı həyata keçirib. Uçuş çərçivəsində 6 motorlu pilotsuz təyyarə 800 metr məsafəyə, Nevada ştatında yerləşən yaşayış evinə yükü müstəqil çatdırıb.

Xeberler.az