Dünya Bankının “Doing Business” layihəsini “Əlverişli Biznes Mühiti” layihəsi əvəzləyib.
Xeberler.az bildirir ki, bu barədə Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.
"Məlum olduğu kimi “Doing Business” üzrə hesabatlarda təhriflərə yol verilməsi, saxtakarlıqlar olması səbəbindən adı çəkilən layihə dayandırılıb. Artıq ölkələr üzrə biznes mühiti ilə bağlı hesabatlar "Əlverişli Biznes Mühiti” layihəsi çərçivəsində hazırlanacaq.
Maraqlıdır ki, yeni layihədə ölkələr üzrə dəyərləndiriləcək təməl kommunal xidmətlər siyahısına İnternet xidməti də əlavə edilib. Bu gün bu layihənin "Kommunal xidmətlərə (internetə) qoşulma” indikatoru ilə bağlı müvafiq sahədə təkmilləşmələrin həyata keçirilməsinə dair 2022 – 2023-cü illər üzrə Yol Xəritəsinin təqdimatı keçirilib. Tədbir Yol Xəritəsində qeyd olunan tədbirlərin müzakirəsi, onların icrası üzrə qarşıda duran vəzifələr, eyni zamanda ölkəmizin beynəlxalq reytinqlərdə mövqeyinin daha da yaxşılaşdırılması məqsədilə təşkil olunub.
Yeri gəlmişkən, xatırladıram ki, BMT-nin eGov üzrə bir neçə gün öncə dərc edilən hesabatında ölkəmizlə bağlı göstəricilər heç də ürəkaçan olmayıb.
Həm də bu hesabatın adında "elektron hökumət" sözü olmasına baxmayaraq metodologiya elə qurulub ki, əslində ölkələrin bütöv rəqəmsal mühiti, o cümlədən internetin vəziyyəti, əlçatanlıq və infrastruktur da dəyərləndirilir.
Azərbaycan İnternetində son zamanlar bir sıra müsbət işlər, xüsusilə də infrastrukturun genişləndirilməsi işləri görülməsinə baxmayaraq xeyli problemlər də var.
Düşünürəm ki, bu gün keçirilən toplantıda qaldırılan məsələlər bu problemlərinn aradan qaldırılmasını sürətləndirəcək. Ümid edirəm Dünya Bankının "Əlverişli Biznes Mühiti” Hesabatında ölkəmiz daha yaxşı göstəricilər qazanacaq.
