TƏHLİL VƏ RƏYLƏR

Rəqəmsal İnkişaf və Nəqliyyat Nazirliyi (RİNN), İnformasiya Kommunikasiya Texnologiyaları Agentliyi (İKTA) və “Aztelekom” son günlər beynəlxalq hesabatlara istinad edərək Azərbaycanda internet xidmətləri üzrə yüksək göstəricilər əldə olunduğunu açıqlayıb. Lakin bu məlumatların mövcud reallığı tam əks etdirmədiyi bildirilir.

Xeberler.az bildirir ki, Azərbaycan İnternet Formunun Prezidenti, ekspert Osman Gündüz sosial şəbəkə hesabında paylaşdığı statusda qeyd edib ki, söhbət Dünya Bankının Business Ready (B-READY) 2025 hesabatında internet xidmətlərinin daxil olduğu kommunal xidmətlər (Utility Services) indikatoru üzrə nəticələrdən gedir. Onun sözlərinə görə, rəsmi qurumların açıqlamaları hesabatın yalnız bir hissəsini əhatə edir və ümumi mənzərəni dolğun şəkildə təqdim etmir.

Ekspertin sözlərinə görə, hesabatda internet xidmətlərinin ilk dəfə kommunal xidmətlər indikatoruna daxil edilməsi müsbət haldır. Bu göstərici üzrə Azərbaycan 83,05 bal toplayaraq 25-ci yerdə qərarlaşıb ki, bu da infrastrukturun mövcudluğu, qoşulma imkanları və əlçatanlıq baxımından kifayət qədər yaxşı nəticə hesab olunur.

Bununla belə, Osman Gündüz vurğulayıb ki, hesabat yalnız bu göstəricidən ibarət deyil. Operational Efficiency (Əməliyyat effektivliyi) indikatoru üzrə Azərbaycan 63,34 bal toplayıb. Bu göstərici internet xidmətlərinin real istifadəsi, yüksək tariflər, məcburi minimal paketlər və qiymət–keyfiyyət uyğunsuzluğu kimi amilləri əhatə edir.

Daha problemli vəziyyət isə Market Competition (Bazar rəqabəti) indikatorunda müşahidə olunur. Hesabata əsasən, Azərbaycan bu göstərici üzrə 45,28 bal toplayaraq aşağı qrupda yer alıb. Bu isə bazarda seçim imkanlarının məhdudluğunu, dominant provayderlərin mövcudluğunu və qiymətlərin rəqabət əsasında formalaşmamasını göstərir.

Ekspertin fikrincə, Business Ready 2025 hesabatı ümumilikdə onu göstərir ki, Azərbaycanda internet infrastrukturu genişdir və kommunal xidmət kimi formalaşıb, lakin qiymətlərin əlçatanlığı, real rəqabət mühiti və istehlakçı üçün seçim imkanları baxımından ciddi problemlər qalmaqdadır.

Osman Gündüz rəsmi qurumların yalnız müsbət bir göstəricini önə çəkərək digər zəif məqamları nəzərə almamasını və birtərəfli açıqlamalar verməsini təəssüf doğuran hal kimi qiymətləndirib.