TƏHLİL VƏ RƏYLƏR

Prezident İlham Əliyevin bu gün səsləndirdiyi tapşırıq sadəcə kadr dəyişikliyi deyil, dövlət idarəçiliyində yeni modelə keçid kimi qiymətləndirilir.

Dövlət başçısı rəqəmsal arxitektura mövzusunda keçirilən müşavirədə nazirliklərdə rəqəmsallaşma, süni intellekt və kibertəhlükəsizlik üzrə ayrıca cavabdeh nazir müavininin olmasının vacibliyini vurğulayıb. Bu yanaşma göstərir ki, rəqəmsal transformasiya artıq texniki məsələ deyil, birbaşa rəhbərlik səviyyəsində strateji məsuliyyət sahəsinə çevrilir.

Xeberler.az bildirir ki, məsələyə Azərbaycan İnternet Formunun Prezidenti, ekspert Osman Gündüz münasibət bildirib.

Ekspertin fikrincə, Prezidentin bu mövqeyi həm də uzun müddətdir mövcud olan koordinasiya probleminin etirafıdır. “Kim kiminlə işləyir və kim cavabdehdir?” sualına daha aydın struktur cavab formalaşdırılır.

"Dünya təcrübəsi də göstərir ki, süni intellekt layihələri struktur dəyişikliklər tələb edir, data mübadiləsi qurumlararası müqavimət yarada bilir, proseslərin avtomatlaşdırılması isə insan faktoruna toxunur. Buna görə də kibertəhlükəsizlik və rəqəmsallaşma ilə bağlı qərarların yalnız İT şöbələri səviyyəsində qalması effektiv deyil.

Müşahidələr göstərir ki, əvvəllər dövlət qurumlarında hətta sadə rəqəmsal layihələrin tətbiqi belə ciddi müqavimətlə qarşılaşırdı. Bu isə İT rəhbərlərinin real dəyişikliklər aparmaq imkanlarını məhdudlaşdırırdı".

Osman Gündüzün sözlərinə görə, Yeni yanaşmanın düzgün tətbiq olunacağı təqdirdə dövlət idarəçiliyində süni intellekt tətbiqlərinin genişlənəcəyi və myGov kimi vahid platformalara keçidin sürətlənəcəyi gözlənilir. Lakin ekspertlər xəbərdarlıq edirlər ki, bu funksiyalar formal şəkildə sahədən xəbərsiz şəxslərə həvalə edilsə və real səlahiyyət, həmçinin büdcə verilməsə, model effektiv işləməyəcək.

Bu tapşırıq onu göstərir ki, rəqəmsallaşma artıq ayrıca layihə deyil, dövlət idarəçiliyinin yeni fəlsəfəsi kimi qəbul olunur.

Müzakirələr fonunda belə sual yaranır: kimlər rəqəmsal üzrə nazir müavini ola bilər?

Ekspert hesab edir ki, hazırda dövlət sektorunda kifayət qədər peşəkar kadr bazası mövcuddur. Bir sıra nazirliklərdə təcrübəli nazir müşavirləri, idarə rəisləri, rəqəmsal mərkəz rəhbərləri və Chief Digital Officer (CDO) vəzifəsini icra edən şəxslər var ki, onlar bu vəzifəni dərhal icra etməyə hazırdırlar.

Bu qərarın yaxın dövrdə konkret kadr dəyişiklikləri ilə müşayiət olunacağı gözlənilir.