MÜSAHİBƏ

ABŞ–İran qarşıdurması fonunda Körfəz ölkələrinin hava hücumundan müdafiə imkanları ilə bağlı yeni reallıqlar ortaya çıxıb. İranın dron hücumları ilə üzləşən bəzi ərəb ölkələri dron təhlükəsinə qarşı texnologiyalar əldə etmək üçün Ukraynaya müraciət ediblər.

Xeberler.az bildirir ki, bunu Azərbaycan İnternet Formunun Prezidenti, ekspert Osman Gündüz deyib.

Ekspertin sözlərinə görə, ABŞ tərəfi də bu istiqamətdə Ukrayna ilə əməkdaşlıq imkanlarını nəzərdən keçirir:

"Uzun illər ərzində hava məkanının qorunması üçün milyonlarla və hətta milyardlarla dollar vəsait xərcləyən Körfəz ölkələri dron hücumlarının qarşısının alınmasında klassik və bahalı hava hücumundan müdafiə sistemlərinin hər zaman effektiv olmadığını müşahidə ediblər. Ekspertlərin fikrincə, bəzən on min dollarlıq dronu məhv etmək üçün milyonlarla dollar dəyərində olan raket sistemlərindən istifadə olunması iqtisadi baxımdan səmərəli sayılmır.

Ukrayna isə son illərdə məhz bu sahədə xüsusi təcrübə formalaşdırıb. Rusiya tərəfindən minlərlə “Shahed” dron hücumuna məruz qalan ölkə bahalı raket sistemləri ilə yanaşı, daha ucuz və kütləvi texnoloji həllərin hazırlanmasına üstünlük verib".

Osman Gündüz bildirib ki, bu məqsədlə Ukrayna hökuməti startapları, biznes sektorunu, elmi-tədqiqat institutlarını və universitetləri prosesə cəlb edərək müdafiə texnologiyaları üzrə geniş ekosistem formalaşdırıb. Hazırda ölkədə Defence Tech sahəsində 2000-dən çox startap fəaliyyət göstərir və yeni hərbi texnologiyalar qısa müddətdə hazırlanaraq real döyüş şəraitində sınaqdan keçirilir:

"Ukrayna artıq yalnız ölkə daxilində deyil, Böyük Britaniya, Almaniya və digər Avropa ölkələrində də hərbi texnologiyaların istehsalını təşkil etməyə başlayıb. Eyni zamanda dünyanın müxtəlif ölkələrindən dron və hərbi texnologiya şirkətləri Ukraynada ofislər açaraq məhsullarını real döyüş şəraitində test edir və inkişaf etdirirlər.

Son illərdə Ukrayna rəhbərliyi bu texnologiyaların daxili tələbatdan artıq istehsal olunmasını nəzərə alaraq onların ixracına da icazə verib. Bu məqsədlə ötən ilin sonundan etibarən hərbi texnologiyaların ixracını tənzimləyən yeni qanunvericilik də qəbul olunub".

Ekspert qeyd edib ki, Ukrayna Prezidenti Volodimir Zelenski Kiyev Aviasiya İnstitutunun tələbələri ilə görüşü zamanı bildirib ki, ölkə dron ixracından ildə 2 milyard dollar gəlir əldə etməyi hədəfləyir:

"Beləliklə, bir neçə il əvvəl “Shahed” dron hücumları ilə mübarizə aparan Ukrayna hazırda həmin təhlükəyə qarşı texnologiya və təcrübə ixrac edən mühüm mərkəzlərdən birinə çevrilməkdədir".