Fermerlər məhsullarını onlayn sata biləcək-Yenilik

24-05-2016 / 12:33

Məlum olduğu kimi, bu ilin aprelin 11-də Prezident İlham Əliyev “Ərzaq məhsullarının tədarükü və təchizatı” Açıq Səhmdar Cəmiyyətinin yaradılması haqqında sərəncam imzalayıb.

Fərmanda Azərbaycanda ərzaq məhsullarının tədarükü və təchizatı ilə bağlı yeni sistemin yaradılması nəzərdə tutulub.

Məsələ ilə bağlı daha ətraflı Kənd Təsərrüfatı Nazirliyinin statistik təhlil şöbəsinin müdiri Firdovsi Fikrətov ilə söhbət etdik.

Firdovsi Fikrətov Xeberler.az-a bildirib ki, “Ərzaq məhsullarının tədarükü və təchizatı” Açıq Səhmdar Cəmiyyətinin yaradılması istiqamətində işlər davam edir.

Onun sözlərinə görə, ASC-nin yaradılması birbaşa kəndlərdə fermerlərin vəziyyətinin yaxşılaşdıracaq və  onların məhsullarının satış imkanlarının genişləndirəcək.

Nazirlik rəsmisi deyib ki, fermer məhsulları ilə bağlı yeni elektron sistem yaradılır və bununla da  həm satınalanlar, həm də məhsulunu təklif edənlər öz məlumatlarını “Elektron məlumat bazası”na yerləşdirəcək:

“Hazırda satılan şirkətlərin təlabatlarından ibarət məlumat bazası toplanır. Yəni,  fermerlərin məhsullarını almaq istəyənlər sistemdə öz tələbatlarını bildirir. Bununla da fermerlər həmin sistemə daxil olanda  satınalanların təlabatını görə bilir. Həmçinin fermerlər də öz təkliflərini sistemdə qeyd edə bilər”.

Firdovsi Fikrətov bu məhsulların onlayn satış və alış qiymətinin müəyyən olunmasına da aydınlıq gətirib:

“Sistemdə satış qiymətləri sərancamda qeyd edildiyi  kimi,  bazarda topdan satış qiymətlərindən aşağı olmadan təyin ediləcək. Bununla bağlı da biz İqtisadiyyat Nazirliyi ilə ildə 4 dəfə monitorinq aparmağı nəzərdə tutmuşuq. Məhsulların bazar qiyməti öyrəniləcək və ona uyğun olaraq sistemdə fermerlərin təklif etdikləri məhsullara qiymət qoyulacaq”.

Şöbə müdiri deyib ki, bu sistemdən daha çox yerli fermerlər bəhrələnəcək. Bütün bu fəaliyyətlər çox şəffaf bir formada həyata keçiriləcək:

 “Bunun da nəticəsində dövlət öz ərzaq ehtiyaclarını tam ödəyə biləcək. Əvvəllər büdcədən ayrılan vəsait hesabına bu işləri ayrı-ayrı təşkilatlar həyata keçirirdi. Artıq bizim öz fermerlər təbəqəmiz formalaşacaq. Onlar dövlət büdcəsindən ayrılan vəsait hesabına sifariş əsasında zəmanətli şəkildə istehsallarını quracaq”.

Şöbə müdirinin sözlərinə görə, ilkin mərhələ olaraq Kənd Təsərrüfatı Nazirliyinin nəzdində ASC-nin hüquqi təşkilati məsələlərini həll edən İşçi Qrupu yaradılıb və bu istiqamətdə Rabitə və  Yüksək  Texnologiyalar Nazirliyinin mütəxəssislərinin köməyindən də istifadə edilir:

 “Hazırda İşçi Qrupu ASC-nin bir qurum kimi formaşalması üçün fəaliyyət prosedurunun yaradılması ilə məşğuldurlar. Sərəncam əsasında ikinci İşçi Qrupu Rabitə və Yüksək Texnologiyalar Nazirliyininin əməkdaşları ilə birgə yaradılıb. Məlum olduğu kimi, Kənd Təsərrüfatı Nazirliyi ASC-nin fəaliyyəti üzrə bütün proseslər “Elektron məlumat bazası” üzərindən idarə edilməlidir. Hazırda həmin İşçi Qrupu “Elektron məlumat bazası”nın yaradılması işlərinin həyata keçirilməsi ilə məşğuldur. Bazanın yaradılması Azərbaycanda tətbiq olunan ilk alətdir. Burada dövlətin başlıca məqsədi yeni qurumun fəaliyyətindən yerli sahibkarların, fermerlərin məlumatlandırılması, onlar üçün yaradılan şəraitdən bəhrələnmələrini təşkil etməkdir”.

 

 Məltəm Talıbzadə


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.