E - HÖKUMƏT

Dövlət Gömrük Komitəsi (DGK) beynəlxalq poçt göndərişləri vasitəsilə malların rüsumsuz idxalı üzrə limiti azaltmağı təklif edir. Məlumdur ki, hazırda  vətəndaşlar  1000 $-lıq malı  e-ticarət yolu ilə  gömrük rüsumsuz ölkəyə gətirə bilir.  

Xatırladaq ki, ötən il yanvar ayında da  DGK  bu limiti 150 manata endirməklə bağlı Nazirlər Kabinetinə müraciət etmişdi.  Lakin bu təklif ciddi ictimai müqavimətlə qarşılaşdığı və aidiyyatı dövlət qurumları tərəfindən dəstəklənmədiyi üçün DGK-nin bu istəyi uğursuzluqla nəticələnmişdi. 

Xeberler.az-ın məlumatına görə,  bu gün DGK-nın sədri Aydın Əliyev mətbuat konfransında  yenidən bu məsələni gündəmə gətirib:

"Fiziki şəxslər tərəfindən istehsal və kommersiya məqsədləri üçün nəzərdə tutulmayan malların gömrük sərhədi vasitəsilə güzəştli və sadələşdirilmiş keçirilməsi haqqında" qaydalara əsasən, əgər 30 gün ərzində eyni fiziki şəxsin adına beynəlxalq poçt bildiriş və ya nəqliyyat şirkəti vasitislə min dollardan baha olmayan mal daxil olursa, gömrük rüsumunun ödənişi nəzərdə tutulmur.

Aydın Əliyev qeyd edib ki, bu, poçt göndərişləri üçün olduqca yüksək məbləğdir: "Ötən ilin ilk 9 ayında poçt göndərişləri vasitəsilə Azərbaycana təqribən 2,5 min ton mal göndərilib. Onun cəmi 2,4 tonu bəyan edilib. Bu, dövlət büdcəsinə gömrük daxil olmalarına real zərərdir".

O əlavə edib ki, idxal edilən malların böyük hissəsi mobil telefonların payına düşür: "Ötən il ölkəyə idxal edilmiş hər 10 telefondan biri telefon tədarükçüləri tərəfindən gətirilib. Nəticədə hər il böyük zərərlə üzləşirik".

Bir daha xatırladırıq ki, əvvəllər də DGK bununla bağlı təşəbbüs irəli sürmüşdü, lakin qurumun bu fəaliyyəti uğursuzluqla nəticələnmişdi.

Xeberler.az