MİLLİ NET

Milli İnternet Mükafatı – MilliNet 2025 müsabiqəsində 1-ci səsvermə mərhələsi başlayıb.

MilliNet TK bildirir ki, bu gündən etibarən müsabiqəyə buraxılan resursların 1-ci mərhələ üzrə qiymətləndirilməsinə başlanıb.

Bu il qiymətləndirmə prosesinə onun daha keyfiyyətli aparılması üçün qeydiyyatın başa çatmasından öncə  başlanıb. Hazırda qeydiyyat davam edir və 15 noyabrda başa çatacaq.

İndiyədək müsabiqəyə 13 Nominasiya üzrə 92 resurs təqdim edilib. İndiyədək təqdim edilən rəqəmsal resurslardan  77-si müsabiqəyə qəbul edilib.

MilliNet Təşkilat Komitəsi bildirir ki, bu müddət ərzində layihələrini təqdim edənlər və müxtəlif problemlər səbəbindən MilliNet TK tərəfindən müsabiqəyə buraxılmayanlar 1-ci səsvermə müddəti bitənədək problemləri aradan qaldırıb yenidən müraciət edə bilərlər.

Hazırda MilliNet.az –da qeydiyyatdan keçən istifadəçilər yalnız müsabiqəyə qəbul edilən saytları bəyənməklə münasibət bildirə bilərlər.

Müsabiqə qaydalarına uyğun olaraq səsvermə 2 mərhələdə həyata keçirilir.

1-ci mərhələ qiymətləndirmə  prosesi  25 noyabr tarixədək davam edəcək. 

1-ci mərhələ səsvermənin nəticələrinə əsasən hər bir nominasiya üzrə nominantlar müəyyən olunacaq. Bu nominantlar arasından  2-ci mərhələ səsvermə nəticəsində qalib saytlar seçiləcək. 2-ci səsvermə prosesi noyabr ayının sonu  başlayacaq və dekabrın 10-dək yekunlaşacaq.

Bu il resurslar 15 münsif tərəfindən qiymətləndiriləcək. “İlin rəqəmsal siması”

Nominasiyası üzrə qalib MilliNet TK tərəfindən müəyyən olunacaq.

Münsiflərin 2-ci mərhələdə verdikləri qiymətlər təqdimat mərasimindən sonra açıqlanacaq.

Qaliblərə MilliNet-in ənənəvi mükafatları, noutbuklar, planşet və telefonlar, diplomlar təqdim ediləcək.  MilliNet2025-in yekun təqdimat mərasiminin dekabr ayında keçirilməsi nəzərdə tutulub.

Milli İnternet Mükafatına  Rəqəmsal İnkişaf və Nəqliyyat Nazirliyi rəsmi dəstək verir.

Əsas tərəfdaşlar İnnovasiya və Rəqəmsal İnkişaf Agentliyi, Xüsusi Rabitə və İnformasiya Təhlükəsizliyi Dövlət Xidmətidir.

MilliNet-in Baş sponsoru CityNet şirkətidir.

Gold sponsorlar AzİnTelecom, Lenovo,  və Caspel şirkətləridir.

Sponsorlar B&B SECURITY,  KATV1, Alas Academy , ULTRA Technologies və Azərbaycan Texniki Universitetidir.

YODA, Mediatrends , NUKHALI  və hellojob.az MilliNet-in tərəfdaşlarıdır.

MilliNet-in media tərəfdaşları  Technote Media,  Xəbərlər.az və Techzone media resurslarıdır.

Azərbaycan İnternet Forumu tərəfindən təsis edilən MilliNet müsabiqəsinin keçirilməsində məqsəd ən yaxşı rəqəmsal resurslarımızı üzə çıxartmaq və tanıtmaq, rəqəmsal sektorda rəqabətli mühit formalaşdırmaq, Azərbaycanda internetin, informasiya texnologiyalarının və innovasiyaların, bütövlükdə rəqəmsal sektorun  inkişafına kömək etmək, rəqəmsal transformasiyanın daha da sürətlənməsinə dəstək verməkdən ibarətdir.

Bir daha bildirmək istərdik ki, rəqəmsal resurs sahibləri 15 noyabr tarixədək aşağıdakı istiqamətlər üzrə layihələrini MilliNet müsabiqəsinə təqdim edə bilərlər:

1. İlin e-ticarət həlli
2. İlin innovativ həlli
3. İlin rəqəmsal sosial resursu
4. İlin rəqəmsal maliyyə həlli
5. İlin rəqəmsal hökumət həlli
6. İlin rəqəmsal təhsil resursu
7. İlin rəqəmsal səhiyyə və sağlamlıq resursu
8. İlin rəqəmsal biznes həlli
9. İlin rəqəmsal marketinq həlli
10. İlin rəqəmsal oyunu
11. İlin informasiya resursu
12. İlin süni intellekt həlli
13. İlin rəqəmsal mədəniyyət və turizm həlli

Ətraflı məlumat üçün məlumat: www.millinet.az