TƏHLÜKƏSİZLİK

Google tədqiqatçılarla birgə dəyərli məlumatları qorumaq səylərini artırmaqdansa, dələduzları ən zəif yerlərindən, yəni ciblərindən vurmaqla kibercinayətkarlığın qarşısını almağın yollarını axtarır.

Xeberler.az-ın məlumatına görə, Kurt Thomas və Elie Bursztein Google onlayn təhlükəsizlik bloqunda yayımladığı “Google fırıldaq və sui-istifadə əleyhinə araşdırma”da belə qeyd edirlər ki, artıq kibercinayətkarlıq böyük, yeraltı iqtisadiyyatın bir parçası olduğundan bütün qanuni bizneslərə çətinlik yaradan eyni problemlərə qarşı müdafiəsizdir. Yəni gəlirləri artırmaq üçün xərcləri stabil saxlamaq lazımdır. Bu əsasla Google komandası təklif edib ki, internetdə fəaliyyət göstərən kriminal qruplaşmaların onlara lazım olan xidmətlərə ödədiyi xərcləri artırmaqla kriminal fəaliyyəti daha yaxşı nəzarətdə saxlamaq olar.

Thomas və Bursztein deyir: “Əgər biz bu ssenariyə iqtisadi mövqedən nəzər yanaşsaq, saxta hesabların, telefon nömrələrinin və ya zərərli veb-saytların xərclərinin artması sui-istifadədən əldə olunan gəlirləri azaldacaq. Nəhayət, qeyri-effektiv xərclərə əsaslanan dələduzluq məhv olacaq”.

Google iddia edir ki, problemə bu cəhətdən yanaşmaq müştəri və şirkətlərin müdafiə sistemlərini gücləndirərək dələduzları hücum üçün yeni yollar tapmağa sövq etdiyi və sonra öz işlərini əvvəlki qaydada görməyə davam etdikləri mövcud dövri prosesi sonlandıra bilər:

“Bu dövrü müdafiə prosesini sonlandırmaq üçün biz sui-istifadəyə qarşı mübarizədə yanaşmamızı da inkişaf etdiririk ki, eyni zamanda bunu dəstəkləyən infrastruktura, maliyyə mərkəzlərinə və buna təşviq edən şəxslərə də zərbə yetirə bilək”, deyə bloqda qeyd edilir.

Google cinayətkarların iş xərclərini artırmağa kömək edən bir neçə halı da göstərib.

“Biz böyük sayda hesabın qeydiyyatının tələb etdiyi xərclər zəncirini öyrənməklə Google hesablarının qara bazarda qiymətlərini 30-40 faiz bahalaşdırmağa nail olmuşuq”.

Bloqda yazılır: “Akademik əməkdaşlarımız göstərir ki, spamlarla reklam edilən qeyri-qanuni dərman və saxta proqramların ödəniş proseslərinin pozulması, onlayn xidmətlərə zərər yetirən saxta hesablara daxil olmağın mümkünsüzləşdirilməsi və botnet infrastrukturların fəaliyyət və idarəetməsinin yararsız vəziyyətə salınması kimi uğurlar da əldə edilib”.

Murad Məmmədzadə