E - HÖKUMƏT

"Elektron Hökumət" portalının operatoru - Rabitə və Yüksək Texnologiyalar Nazirliyinin Məlumat Hesablama Mərkəzi tərəfindən bu ilin 3 rübü ərzində  portalın xidmətlərindən ən çox istifadə edilən sahələr açıqlanıb.

E-xidmətlərindən ən çox istifadə olunan qurumlar:

Əmək və Əhalinin Sosial Müdafiəsi Nazirliyi (ƏƏSMN) -4570597

Tələbə Qəbulu üzrə Dövlət Komissiyası (TQDK)-4245812

Rabitə və Yüksək Texnologiyalar Nazirliyi (RYTN)-4047190

Statistik məlumata görə, TQDK-nın e-xidmətlərindən 3 rüb ərzində ümumilikdə 4245812 dəfə istifadə edilib.

Xeberler.az olaraq e-xidmətləri daha populyar olan qurumlarn elektron hazırlığı ilə ətraflı maraqlandıq. 

TQDK-dan saytımıza verilən məlumata görə, ümumilikdə 9 ay ərzində qurumun e-xidmətlərindən istifadə sayı 5366942 dəfə olub.

Ən çox istifadə edilən isə “Namizədlərə, sınaq imtahanı iştirakçılarına imtahan nəticələri haqqında məlumatların internet və  ya qısa mesaj (SMS) vasitəsilə verilməsi” xidməti olub ( 2387349) .

Daha sonra “TQDK-nın virtual ödəmə kartlarının onlayn və qısa mesaj (SMS) vasitəsilə satışı” ( 399617) və “Namizədlərə onların cavab kartlarının qrafik təsvirlərinin internet vasitəsilə verilməsi” (337445)  e-xidmətlərindən daha çox istifadə edilib.

O cümlədən mobil texnologiyalar ( bütün mobil operatorlar) əsasında qurulmuş xidmətlərdən istifadə sayı da açıqlanıb.

“Namizədlərə, sınaq imtahanı iştirakçılarına imtahan nəticələri haqqında məlumatların internet və ya qısa mesaj (SMS) vasitəsilə verilməsi” mobil xidmətindən 590639, “TQDK-nın virtual ödəmə kartlarının onlayn və qısa mesaj (SMS) vasitəsilə satışı”  xidmətindən 329841, “TQDK-nın yenilikləri barədə SMS məlumatlandırma” xidmətindən isə 887 dəfə istifadə edilib.

Məlumat verdiyimiz kimi, ötən il TQDK “Tələbə-məzun” və “Şagird və məzun”  e-xidmətlərini yaradaraq portala inteqrasiya etdi.

Belə ki, portal istifadəçiləri həmçinin “Vətəndaş haqqında "Tələbə-məzun" dövlət elektron məlumat sistemindən çıxarış”ı avtomatik olaraq formalaşdıraraq həm çap edə, həm də elektron şəkildə aidiyyatı quruma göndərə bilərlər.

“Tələbə-Məzun" dövlət elektron sistemi üzrə elektron müraciətin formalaşdırılması zamanı  fərdin kimliyi avtomatik müəyyən olunur, əlaqədar təhsil müəssisəsi seçilməklə tələb olunan müvafiq məlumatlar və müraciət qeyd olunur.

“Şagird-məzun” sistemindən 9 ay ərzində 16688 dəfə istifadə edilib.

Məlumata görə, TQDK-nın 15 elektron xidmət var və hamısı "Elektron hökümət" portalına inteqrasiya olunub:

Bakalavrların bakalavr pilləsinə qəbul olmaq üçün təqdim etdikləri ərizələrin iş nömrələrinin axtarışı

İnternetdə video mühazirələr

Namizədlərə imtahana buraxılış vərəqələrinin internet vasitəsilə verilməsi

Namizədlərə onların cavab kartlarının qrafik təsvirlərinin internet vasitəsilə verilməsi

Namizədlərə, sınaq imtahanı iştirakçılarına imtahan nəticələri haqqında məlumatların internet və ya qısa mesaj (SMS) vasitəsilə verilməsi

Namizədlərin (abituriyentlərin, bakalavrların, namizədlərin (rezidenturaya sənəd verənlər) ərizələrinin onlayn qəbulu

Namizədlərin elektron ixtisas seçimi ərizələrinin onlayn qəbulu

Onlayn sınaq imtahanının keçirilməsi

Sınaq imtahanına yazılış

TQDK nəşrlərinin və onların elektron versiyalarının onlayn satışı

TQDK-nın virtual ödəmə kartlarının onlayn və qısa mesaj (SMS) vasitəsilə satışı

TQDK-nın yenilikləri barədə SMS məlumatlandırma

Ümumi təhsili həyata keçirən təhsil müəssisələrində ümumtəhsil fənləri üzrə biliyinin yekun qiymətləndirilməsi (attestasiyası) aparılan təhsilalanların TQDK-nın "Şagird-məzun sistemi"ndə özləri haqqında məlumatları internet vasitəsilə yoxlaması

Vətəndaş haqqında "Tələbə-məzun" dövlət elektron məlumat sistemindən çıxarış

Vətəndaşların TQDK-nın rəhbərliyinin və məsul işçilərinin qəbuluna onlayn yazılması

Bununla yanaşı, hazırda TQDK "Nəzarətçilərin elektron qeydiyyatı"nı da həyata keçirir.

Belə ki, “Nəzarətçilərin elektron qeydiyyatı” sistemi tələb olunan məlumatların daxil edilməsi üçün noyabrın 21-dən dekabrın 9-dək aktivdir.

Ümumiyyətlə, TQDK elektron hökumət quruculuğu prosesində ən aktiv iştirak edən qurumlardandır desək, yanılmarıq.  Xatırladaq ki, bu qurum həm də bu sahədə ilk addım atanlardan olub.

Uzun illər addım-addım öz xidmətlərini, abituriyent-TQDK münasibətlərini, vətəndaşlarla olan münasibətləri demək olar ki, tamamilə elektronlaşdırıb.

Qurum “Elektron hökumət” portalı ilə sıx əməkdaşlıq edərək özünün bütün xidmətlərini portala da inteqrasiya edə bilib.

Şagirdlər, tələbələrlə bağlı məlumat bazalarını təmizləmək, dəqiqləşdirmək , yeniləmək nə qədər çətin olsa da, TQDK digər əlaqəli qurumlarla birgə bu sahədə təkmil bir sistem qura bilib.

TQDK həm də bu sahədə peşəkar kadrlara malik olan azsaylı dövlət qurumlardandır.

Yeri gəlimşkən, qeyd etmək istərdik ki,  ali və orta təhsil müəsissələrində hələlik elektron hökumət quruculuğu istiqamətində ciddi problemlər qalmaqdadır. Xüsusilə də uzun müddətdir təhsil sisteminin informasiyalaşması ilə bağlı sistemli bir yanaşma olmadığından və bu sahədə dövlət proqramının qəbulunun ləngiməsi  də bütövlükdə təhsilin elektronlaşması prosesini uzadıb.

Hələ də ali təhsil sistemində oflayn informasiya münasibətləri, kağız sənədləşmənin üstünlük təşkil etdiyini də vurğulamaq istərdik.

Bütün bunları nəzərə alaraq hesab edirik ki, bu sahədə, təhsil xidmətlərinin elektron formaya keçirilməsində, onlayn informasiya münasibətlərinin qurulmasında  TQDK-nın informasiya sistemlərindən, onun təcrübəsindən və potensialından istifadə etmək faydalı olardı.

Məltəm Talıbzadə