E - HÖKUMƏT

Məlumat verdiyimiz kimi,  Rabitə və Yüksək Texnologiyalar Nazirliyinin tabeliyində  İnformasiya Texnologiyalarının İnkişafı Dövlət Fondunun 1-ci qrant müsabiqəsində qalib layihələrdən biri də MedNot-dur. 

Bu layihə özündə həkim - xəstə - aptek münasibətlərini ehtiva edən, xəstəliklərin, xəstələrin, yazılan və alınan dərmanların statistikasını müxtəlif rakurslardan ( mövsüm,region, yaş qrupu, cins və s.) toplayan və bunu maraqlı tərəflərə ( əhali, həkimlər, apteklər, dərman şirkətləri, klinikalar, Səhiyyə Nazirliyi) açıqlaya bilən onlayn şəbəkədir.

Xeberler.az-ın məlumatına görə, MedNot layihəsi tərəfindən  dünən "Sığorta şirkətləri üçün perspektivlər” mövzusunda tədbir keçirilib.

Layihənin ideya müəllifi İlqar Tağıyev MedNot layihəsinin məqsədi, tətbiq istiqamətləri, sığortaçılar üçün əhəmiyyətindən bəhs edən təqdimatla çıxış edib.
 
O bildirib ki, MedNot həkimlərlə xəstələr, o cümlədən apteklərlə dərman şirkətləri arasında əlaqə yaradan veb saytdır.

Müəllifin sözlərinə görə, saytdan qeydiyyatdan keçdikdən sonra əldə olunan kod vasitəsilə mobil telefon və ya kompüter vasitəsilə həkim və ya pasient, həmçinin dərmanlar haqda operativ məlumatlar əldə etmək olacaq. Bundan başqa, sayt vasitəsilə dərman sifarişini sms və ya onlayn şəkildə həyata keçirmək mümkünləşəcək. 

İlqar Tağıyev onu da qeyd edib ki, layihənin sığortaçılar üçün də əhəmiyyəti var. Belə ki, saytdakı məlumatları İcbari Tibbi Sığorta, o cümlədən digər sığorta şirkətləri üçün informasiya bazası kimi istifadə etmək mümkündür.

Xeberler.az