TƏHLÜKƏSİZLİK

İngiltərədəki Intelligent Environments şirkəti 4 rəqəmdən ibarət olan bəsit şifrələrə alternativ olaraq ifadə nişanlarının istifadə edilə biləcəyi şifrə sistemi yaradıb.

Xeberler.az xarici mətbuata istinadən məlumat verir ki, 0-dan 9-a qədər rəqəmlər yerinə 44 simvoldan istifadə ediləcək "Emoji Passcode" adlı xidməti istifadəyə verilib.

Şirkət rəhbəri David Webber 15-25 yaş arasındakı gənclər üçün nəzərdə tutulan  sistemə bəzi bankların maraq göstərdiyini bildirib.

Tətbiqin bir icad olmadığını bu səbəblə patentini almadıqlarını ifadə edən Webber, Emoji Passcode sayəsində bank xidmətlərinin həm əyləncəli həm də daha etibarlı olacağını qeyd edib.

Təhlükəsizlik üzrə mütəxəssis Alan Woodward isə  bəzi şirkətlərin daha əvvəldən buna oxşar  proqramlar istifadə etdiyini qeyd edib. 

Həmçinin ifadə nişanlarından istifadənin şifrələrin xatırlanmasını asanlaşdıracağını deyən Woodward, kompüter piratlarının yenə də bu sistemləri qıra biləcəyini də qeyd edib. Bu səbəbdən  o, iki mərhələli şəxsiyyət təsdiqlənməsinin vacib olduğunu diqqətə çatdırıb. 

Rəqəmlərdən daha asan xatırlandığı qeyd edilən ifadə nişanları ilk dəfə 1960-cı illərdə istifadə edilib. 1982-ci ildən etibarən isə gündəlik həyatda tez-tez istifadə edilməyə başlanıb. Hazırda bütün “messenger”-lərdə və elektron poçtlarda aktiv istifadə edilir.

Sevinc Çəltikova