MÜSAHİBƏ

İnformasiya və kommunikasiya texnologiyaları (İKT) sektorunda tənzimləmə mexanizmlərinin effektivliyi ilə bağlı narazılıqlar davam edir. Ötən həftə İnformasiya Kommunikasiya Texnologiyaları Agentliyi (İKTA) 2025-ci il üzrə illik hesabatını açıqlasa da, sənədin məzmunu ilə bağlı tənqidlər səsləndirilib.

Xeberler.az bildirir ki, buna Azərbyacan İnternet Formunun Prezidenti, ekspert Osman Gündüz münasibət bildirib.

Ekspertin fikrincə, təqdim olunan hesabat daha çox texniki-statistik göstəricilərin toplanması və təqdimatı ilə məhdudlaşır. Hesabatda internet sürətlərinin ölçülməsi, abunəçilərin sayının qeydiyyatı, reyestrlərin yenilənməsi kimi məsələlər yer alsa da, sektorun əsas problemlərinə toxunulmadığı bildirilir.

O, qeyd edib ki, cəmiyyət üçün mühüm əhəmiyyət kəsb edən bir sıra məsələlər hesabatda əksini tapmayıb. Bunlara internet tariflərində seçim imkanlarının olmaması, mobil operatorların qiymət siyasətinə münasibət, 5G lisenziyalarının verilməsi ilə bağlı qeyri-müəyyənlik daxildir:

"Bundan əlavə, bazarda rəqabət mühitinin real vəziyyəti, provayderlərin dominantlıq məsələsi, virtual mobil operatorlarla bağlı yanaşma, dövlətə məxsus GPON infrastrukturundan özəl sektorun istifadə qaydaları kimi mühüm mövzuların da diqqətdən kənarda qaldığı vurğulanır".

Ekspert həmçinin regionlarda internetin əlçatanlığı, qiymət–gəlir balansı və xidmət keyfiyyəti ilə bağlı problemlərin də hesabatda qiymətləndirilmədiyini qeyd edib. Müştərilərin internet xidmətlərindən yararlana bilmədiyi hallarda kompensasiya mexanizmlərinin olmaması da əsas çatışmazlıqlar sırasında göstərilir.

Osman Gündüzün sözlərinə görə, tənzimləyici qurum yalnız statistik məlumatları toplayan orqan kimi deyil, bazara real təsir göstərən, rəqabəti təşviq edən və istehlakçı hüquqlarını qoruyan institut kimi fəaliyyət göstərməlidir:

"Əgər bu kimi problemlər rəsmi hesabatlarda əksini tapmırsa, bu, ya prioritetlərin düzgün müəyyən edilmədiyini, ya da mövcud problemlərin diqqətdən kənarda saxlanıldığını göstərir".

Sonda ekspert İKTA-nın fəaliyyətinin gücləndirilməsini, səlahiyyətlərinin artırılmasını və bazarın struktur problemlərinə birbaşa müdaxilə imkanlarının genişləndirilməsini vacib sayır. Əks halda, bu cür hesabatların sektorda real dəyişiklik yaratmadan formal sənədlər kimi qalacağı bildirib.