"“Starlink Azerbaijan” hələ "bismillah" deməmiş, İKTA artıq hesabat istəyir. Sektorun tənzimləyici qurumu – İnformasiya Kommunikasiya Texnologiyaları Agentliyi (İKTA) “Starlink Azerbaijan” MMC-dən hesabat tələb edib. Qurum bu barədə rəsmi açıqlama yayıb".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert bildirib ki, son zamanlar bu tənzimləyici qurum yalnız sektorun ictimaiyyətini təəccübləndirməyə üstünlük verir, o da məcbur olub bu halları gündəmə gətirməli olur:
"“Starlink Azerbaijan” hələ bazara yeni daxil olub, necə deyərlər, hələ "bismillah" deməyib. Belə bir vaxtda qurum rəhbərliyi ilə keçirilən görüşün əsas mövzusunu məhz bu hesabat məsələsi kimi təqdim etmək doğrudanmı məqsədəuyğundur?
Ortada bu qədər ciddi tənzimləmə problemi durarkən, 40 ildir fəaliyyət göstərən nəhəng dövlət provayderi Aztelekom-dan hesabat tələb etmək İKTA-nın yadına düşmür".
Osman Gündüzün sözlərinə görə, saytlarına baxanda bu dövlət şirkətinin 2022-ci ildən sonrakı dövr üçün heç maliyyə hesabatı da gözə dəymir:
"Ayda, təkrar edirəm hər ay 75 milyon manat gəlir əldə edən bu qurumdan bölgələrdə internetin qiymətində alternativ seçim yaratmaq tələb edilmir, heç olmasa, buna dair bir xahiş belə edilmir.
Ayda 75 milyon manat qazanan bu dövlət şirkəti kənddə 300 manat sosial müavinət alan vətəndaşın 25 manatına "möhtac" qalıb.
Tənzimləyici qurum da bunu görməzdən gəlir.
Yerdəkinə gücü çatmır, göydəkindən hesabat istəyir. Çox təəssüf edirəm.
Bilmirəm, bəlkə də yay hələ bitməyib deyə, İKTA rəhbərliyi hələ də belə bəsit və mənasız rəsmi açıqlamalara üstünlük verir".
