Rəqəmsal İnkişaf və Nəqliyyat Nazirliyi (RİNN) tabeliyində İnformasiya Kommunikasiya Texnologiyaları Agentliyinin (İKTA) İCTA.AZ saytı fəaliyyətə başlayıb.
Xeberler.az bildirir ki, bu barədə Azərbaycan İnternet Forumunun prezidenti, ekspert Osman Gündüz paylaşım edib.
Onun sözlərinə görə, ötən ildən yaradılmasına baxmayaraq cari ilin əvvəlindən fəaliyyətə başlayan İKTA-nın indiyədək rəsmi internet resursu aktiv deyildi.
Azərbaycanın telekommunikasiya və poçt sahəsinin tənzimləyici qurumu rəsmi saytına xeyli materiallar yerləşdirib. 125 provayder haqqında geniş məlumat, əlaqə vasitələri, müraciət etmək imkanları sayta yerləşdirilib.
"Yeganə çatışmazlıq odur ki, bu provayderlərin xidmət göstərdiyi ərazilər qeyd edilməyib. Qurum uçot içlərini davam etdirir, ümid edək qarşıdakı dövrdə vacib olan bu məsələ də öz əksini tapacaq. Yeri gəlmişkən, gələcəkdə elə bu resursda internet istifadəçisinin öz provayderini dəyişmək, yenisini seçmək imkanın yaradılması da faydalı olardı. Qurumun sayta yerləşdirdiyi strukturundan görsənir ki, əsas diqqət tənzimləmə və istehlakçı hüquqlarının qorunmasına yönələcək. Hansı ki, məhz bu sahələrdə, xüsusilə də rəqəmsal sektorda istehlakçı hüquqlarının qorunmasında ciddi problemlər var",-deyə Osman Gündüz qeyd edib.
Ekspert onu da əlavə edib ki, provayderlərdən, telekommunikasiya xidmətlərindən (internet, mobil rabitə, telefon, poçt) narazı olanlar quruma müraciət edə bilərlər.
