İnformasiya Kommunikasiya Texnologiyaları Agentliyi (İKTA) və Audiovizual Şura audiovizual media fəaliyyəti göstərən elektron kommunikasiya operator və provayderlərinin nümayəndələri ilə işgüzar görüş keçirib.
Xeberler.az məlumat verir ki, görüş zamanı audiovizual media sahəsində qüvvədə olan normativ hüquqi aktların tələbləri iştirakçıların diqqətinə çatdırılıb. Qeyd olunub ki, televiziya proqramlarının IP şəbəkələr üzərindən paket şəklində təqdim edilməsi audiovizual proqramların retranslyasiyası hesab olunur və bu fəaliyyət yalnız Audiovizual Şura tərəfindən verilən platforma operatoru lisenziyası əsasında həyata keçirilməlidir.
Bildirilib ki, audiovizual məhsulların istifadəçinin seçimi əsasında (istəyə görə baxış – VOD modeli) təqdim edilməsi sifarişli audiovizual yayım xidməti sayılır və bu fəaliyyət üçün də müvafiq lisenziya tələb olunur. Lisenziyasız fəaliyyət qanunvericiliyin pozulması hesab edilir və məsuliyyət tədbirlərinə səbəb ola bilər.
Görüşdə vurğulanıb ki, hazırda bu sahədə fəaliyyət göstərən, lakin müvafiq lisenziyaya malik olmayan provayderlər qısa müddətdə lisenziyalaşdırma prosedurunu başa çatdırmalıdırlar.
Həmçinin qeyd olunub ki, audiovizual məzmunu digər platforma operatorlarının infrastrukturu vasitəsilə təqdim edən provayderlər ya müstəqil şəkildə lisenziya almalı, ya da xidmətin hansı hüquqi əsasla və hansı lisenziya sahibi vasitəsilə təqdim edildiyi barədə rəsmi internet resurslarında açıq məlumat yerləşdirməlidirlər. Bu yanaşmanın istehlakçıların düzgün məlumatlandırılması və bazarda şəffaflığın təmin olunması baxımından mühüm əhəmiyyət daşıdığı bildirilib.
Sonda iştirakçılara xatırladılıb ki, lisenziya almaq üçün Audiovizual Şuraya qanunvericiliyə uyğun şəkildə müraciət edilməli və tələb olunan sənədlər təqdim olunmalıdır.
İKTA və Audiovizual Şura audiovizual media bazarında qanuni fəaliyyətin təmin edilməsi, istehlakçı hüquqlarının qorunması və rəqabət mühitinin gücləndirilməsi istiqamətində birgə fəaliyyətlərini davam etdirəcəklər.
