TEXNOLOGİYA

İnnovasiya və Rəqəmsal İnkişaf Agentliyinin Nüvə tədqiqatları departamentinin fəaliyyətini əks etdirən videoçarx təqdim olunub.

Xeberler.az məlumat verir ki, videoda radiasiya texnologiyaları, məhsulların sterilizasiyası, qamma şüalandırması və radionuklid analizi üzrə xidmətlər, müasir laboratoriya imkanları və eləcədə ölkəmizdə sahibsiz radioaktiv materialların axtarışı ilə bağlı ətraflı məlumat yer alıb.

Qeyd edək ki, Nüvə tədqiqatları departamenti radionuklid analizləri, qamma şüalandırma, radiasiya cihazlarının quraşdırılması və təmiri, nüvə kriminalistikası sahəsində xidmət göstərir və radiasiya və nüvə texnologiyalarını tətbiq edərək ölkəmizdə radiasiya təhlükəsizliyinə tövhə verir. Departament tərəfindən mineral sular, qida və sənaye məhsullarının radiasiya təhlükəsizliyi üzrə radioloji sınaqları həyata keçirilir.

Qamma şüalandırma texnologiyası tibbi və əczaçılıq məhsullarının sterilizasiyası, qida məhsullarının mikrob yükünün azaldılması və rəf ömrünün uzadılması məqsədilə istifadə olunur. Eyni zamanda bu texnologiya qədim əlyazmaların, mədəni irsin qorunması və polimer tullantıların utilizasiyası kimi digər sahələrdə də tətbiq edilir.

Departament radioloji ölçü avadanlıqlarının quraşdırılması, sazlanması, texniki xidməti və təmiri, eləcə də sənaye mühitində avtomatlaşdırma işləri kimi sifarişləri həyata keçirir. Bununla yanaşı, istifadəçilər və mütəxəssislər üçün təlim proqramları təşkil edir, elmi-tədqiqat layihələri həyata keçirir və beynəlxalq əməkdaşlıq çərçivəsində fəaliyyət göstərir.

Eyni zamanda, nüvə kriminalistikası sahəsində işğaldan azad edilmiş ərazilərdə radioekoloji tədqiqatlar aparılır.

Dövlət obyektləri, yaşayış məntəqələri, su mənbələri və əkin sahələrinin radiasiya təhlükəsizliyi tədqiq edilir. Sahibsiz radioaktiv mənbələri və qeyri-qanuni tranzit zamanı aşkar edilən nüvə və radioaktiv materiallarının ekspertizasını yerində həyata keçirir, aidiyyəti qurumlara texniki və metodik dəstək göstərir.