TƏDBİRLƏR

Məlumat verdiyimiz kimi, Bakıda Eurodesign və Cisco şirkətlərinin təşkilatçılığı ilə kibertəhlükəsizlik üzrə turnir keçirilib.

Xeberler.az bildirir ki, turnirdə ölkənin informasiya təhlükəsizliyi üzrə aparıcı mütəxəssisləri öz biliklərini nümayiş etdirmək və qiymətli mükafatlar uğrunda mübarizə aparmaq imkanı əldə edib.

İki komandaya kiber hücum baş verdiyi halda şirkətlərin informasiya təhlükəsizliyi şöbələrinin fəaliyyəti ilə bağlı ssenari üzrə sualları cavablandırmaq təklif olunub.

 Qeyd edək ki,  özlərini "Yaşıl qalxan" (Fərid Zeynalov, Emin Əlihüseynov, Əzim Qəmbərli, Elvin Hacıyev, Ruslan Rəsulov) və "Critical Alert" (Sinan Əliyev, Səlami Məmmədov, Səbuhi Səfərov, Orxan Yolçiyev, Ruslan Quliyev) adlandırmış hər iki komanda qoyulan tapşırığın öhdəsindən  gələ bilib.

Nəzərə alsaq ki, komandalar ümumilikdə 10 suala cavab verməli olub və qiymətləndirmə zamanı yalnız münsiflər heyətinin verdiyi səslər deyil, həm də zalın rəyi nəzərə alınıb, cəmi bir xal fərqi ilə "Yaşıl qalxan" komandası qələbə qazanıb.

Həmçinin, tədbir çərçivəsində Cisco mütəxəssisləri hücumun bütün mərhələlərini (hücumdan əvvəli, hücum zamanını və sonrasını) nəzərə alan informasiya təhlükəsizliyinin yeni modelini təqdim edib.

Son tendensiyalar sübut edib ki, yalnız hücumların aşkarlanması və bloklanmasına əsaslanan ənənəvi müdafiə üsulları artıq effektiv deyil. Biznesin informasiya təhlükəsizliyi siyasəti davamlı diaqnostika və vaxtında yenilənməyə ehtiyac duyur. Yalnız bu yolla şirkətlər hər gün dəyişən kibertəhlükələrə qarşı tab gətirə və qarşıya qoyulan məqsədlərə nail ola bilərlər.

Eurodesign şirkəti informasiya təhlükəsizliyi texnologiyalarının tətbiqi sahəsindəki təcrübəsini bölüşmüş, eləcə də Bakı 2015 Birinci Avropa Oyunları, Bakı 2017 IV İslam Həmrəyliyi Oyunları, Formula 1 kimi irimiqyaslı tədbirlərin keçirilməsi zamanı xaker hücumlarının qarşısını almaq üçün istifadə olunan alətlərdən bəhs edib.

Tədbirin qonaqları həmçinin maliyyə fırıldaqçılığı, məxfi və ya fərdi məlumatların oğurlanması, dələduzluq və informasiya sistemlərinin sıradan çıxarılması kimi kibercinayətkalığın müxtəlif təzahürlərinə qarşı praktik mübarizə halları ilə tanış olmaq imkanı əldə edib.

Məltəm Talıbzadə