TƏHLÜKƏSİZLİK

03 iyun 2026-cı il tarixində Azərbaycan Respublikası Elm və Təhsil Nazirliyi-nin İnformasiya Texnologiyaları İnstitutu, Azərbaycan Respublikası Dövlət Təhlükəsizliyi Xidməti-nin Heydər Əliyev adına Akademiyası, Azərbaycan Texniki Universiteti və Azərbaycan Kibertəhlükəsizlik Təşkilatları Assosiasiyası-nın birgə təşkilatçılığı ilə “Kibertəhlükəsizlik və rəqəmsal kriminalistikanın aktual problemləri” mövzusunda respublika elmi-praktiki konfrans keçiriləcək.

Xeberler.az bildirir ki, konfransın əsas məqsədi kibertəhlükəsizlik və rəqəmsal kriminalistika sahələrində aktual elmi-praktiki problemlərin müzakirəsi üçün intellektual platforma yaratmaq, ölkədə bu istiqamətlər üzrə aparılan fundamental və tətbiqi tədqiqatların mövcud vəziyyətini dəyərləndirmək, həmçinin gələcək inkişaf istiqamətlərini müəyyənləşdirməkdir.

Tədbir çərçivəsində kibertəhlükəsizliyin elmi-nəzəri əsasları və qabaqcıl texnologiyalar, müasir informasiya sistemlərinin təhlükəsizliyi, kiberhücumların aşkarlanması, kibertəhdidlərin analizi, hüquqi və etik məsələlər, kritik informasiya infrastrukturlarının qorunması, eləcə də kibertəhlükəsizlik sahəsində təhsil və innovasiya mövzuları müzakirə olunacaq. Bununla yanaşı, rəqəmsal kriminalistika üzrə süni intellekt texnologiyaları, rəqəmsal sübutların toplanması və analizi, kibercinayətlərin araşdırılması, rəqəmsal identifikasiya, informasiya müharibəsi və digər aktual istiqamətlər də konfransın gündəliyinə daxildir.

Konfransa təqdim olunacaq məruzələr Azərbaycan, ingilis və ya rus dillərində qəbul edilir. Elmi işlərdə mövzunun aktuallığı, problemin qoyuluşu, həlli yolları və əldə olunan nəticələrin elmi-praktiki əhəmiyyəti öz əksini tapmalıdır. Məruzələrin həcmi minimum 4 səhifə olmaqla IEEE standartlarına uyğun hazırlanmalı və elektron formada təqdim edilməlidir.

Məruzələrin qəbulu üçün son tarix 25 aprel 2026-cı il, elmi ekspertiza nəticələrinin açıqlanması isə 12 may 2026-cı il tarixidir. Konfransın əsas iş günü isə 03 iyun 2026-cı il olaraq müəyyən edilib.

Məruzələr elektron şəkildə [email protected] ünvanına göndərilməlidir. Məruzəçilər təqdimat üçün MS PowerPoint proqramında “On-screen Show” formatında slaydlar hazırlamalıdırlar.