MÜSAHİBƏ

“Bir aydan sonra, avqustun 4-də Bakıda Beynəlxalq İnformatika Olimpiadası keçiriləcək. Hazırlıqlar davam edir. 8 məktəblidən ibarət iki komandamız bu nüfuzlu yarışmaya hazırlaşır. 90-dan çox ölkədən 500-dək məktəbli yarışa qatılacaq. Nəticələr necə olacağını isə indidən demək çox çətindir”.

Xeberler.az bildiri ki, bunu "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz deyib. Osman Gündüz, informatika sahəsində uğurların olduqca az olmasına baxmayaraq, hökumətin bu il üçün hazırlıq prosesinə ciddi şəkildə diqqət ayırdığını vurğulayıb: “Qazanılan medalların statistikasına baxsaq görərik ki, son 25 ilin nəticəsi ölkəmiz üçün elə də uğurlu olmayıb: Azərbaycan – 5 medal, Gürcüstan - 47 medal, Ermənistan – 28 medal, Rusiya - 108 medal, Estoniya - 59 medal.

Ümumiyyətlə, statistika göstərir ki, bizdə digər fənlərə nisbətən İnformatikadan medallar hədsiz dərəcədə azdır. Digər fənlər üzrə Türk liseylərinin də yaxından iştirakı ilə uğurlar var. Qəribədir ki, bizdə Türk liseylərində də informatika sahəsində ciddi uğurlar olmayıb. Ümid edirəm, səlahiyyətli qurumlar yuxarıdakı cədvəldən xəbərdardırlar. Bu il üçün hökumət hazırlıq proseslərinə daha ciddi resurslar səfərbər edib, ADA Universitetini, BMU-nu və hətta uşaqların hazırlığına dəstək üçün xaricdən ekspertləri də olimpiadaya hazırlıq prosesinə cəlb edib. İnformatikanın taleyində həlledici rol oynayan, DİM və TN-nin birgə həll etməli olduğu “İnformatika, yoxsa Kimya” problemi indiyədək də həllini tapmayıb. Düşünürəm ki, məhz bu problem ölkədə İnformatikanın inkişafını əngəlləyən əsas problemlərdən biri olaraq qalır”.