Milli İnternet Mükafatı – MilliNet2025 Təşkilat Komitəsinin növbəti toplantısı keçirilib. Toplantıda yekun səsvermənin nəticələri və MilliNet Təqdimat mərasiminə hazırlıq məsələləri müzakirə edilib.
Xeberler.az bildirir ki, toplantıda Milli Net 2025 müsabiqəsində səsvermənin 2-ci mərhələsinin uğurla başa çatdığı bildirilib.
Yekun səsvermə prosesi Nominanat statusu qazanan 63 rəqəmsal resurs arasında 10 gün davam edib. Müsabiqəyə 13 Nominasiya üzrə 179 rəqəmsal resurs təqdim edilmişdi.
2-ci mərhələ qiymətləndrimə prosesində 15 münsifdən 13-ü iştirak edib. İki münsif qiymətləndirməni tam olaraq başa çatdırmadığı üçün onların səsvermə nəticələri ləğv edilib.
Təqdimat mərasimindən sonra nominantlar münsiflərin verdiyi ballar və onların əsaslandırması ilə öz hesablarına daxil olmaqla tanış ola biləcəklər.
“Milli Net 2025” qaliblərinin adları Milli İnternet Mükafatının ənənəvi yekun təqdimat mərasimində açıqlanacaq.
Yekun təqdimat mərasimi 15 dekabr tarixdə Park İnn Hoteldə keçiriləcək.
MilliNet TK tərəfindən aparılan mükafatlandırma mərasiminə hazırlıq işləri artıq başa çatıb. Azərbaycan İnternetinin əsas tədbiri olan MilliNet yekun təqdimat mərasimində rəqəmsal sektorun tanınmış nümayəndələri iştirak edəcəklər.
Müsabiqədə hər bir Nominasiya üzrə qalib gələnlərə Milli Net-in xüsusi mükafatı – hörümçək əks olunan BUTA və qiymətli hədiyyələr təqdim olunacaq. 2-ci və 3-cü yerlərin qaliblərinə də diplomlar və qiymətli hədiyyələr təqdim olunacaq.
Tədbirdə 2025-ci il üçün ölkədə rəqəmsal transformasiyaya daha çox töhfə verən “İlin rəqəmsal siması” elan olunacaq və onun qalibinə də mükafatlar təqdim ediləcək.
Qeyd edək ki, Milli İnternet Mükafatına Rəqəmsal İnkişaf və Nəqliyyat Nazirliyi rəsmi dəstək verir.
Əsas tərəfdaşlar İnnovasiya və Rəqəmsal İnkişaf Agentliyi, Xüsusi Rabitə və İnformasiya Təhlükəsizliyi Dövlət Xidmətidir.
MilliNet-in Baş sponsoru CityNet şirkətidir.
Gold sponsorlar AzİnTelecom, Lenovo, və Caspel şirkətləridir.
Sponsorlar B&B SECURITY, KATV1, Alas Academy, ULTRA Technologies və Azərbaycan Texniki Universitetidir.
YODA, Mediatrends, NUKHALI və hellojob.az MilliNet-in tərəfdaşlarıdır.
MilliNet-in media tərəfdaşları Technote Media,
Xəbərlər.az və Techzone media resurslarıdır.
Azərbaycan İnternet Forumu tərəfindən təsis edilən MilliNet müsabiqəsinin keçirilməsində məqsəd ən yaxşı rəqəmsal resurslarımızı üzə çıxartmaq və tanıtmaq, rəqəmsal sektorda rəqabətli mühit formalaşdırmaq, Azərbaycanda internetin, informasiya texnologiyalarının və innovasiyaların, bütövlükdə rəqəmsal sektorun inkişafına kömək etmək, rəqəmsal transformasiyanın daha da sürətlənməsinə dəstək verməkdən ibarətdir.
