TƏDBİRLƏR

İstanbulda “Xəbərin müəllif hüquqları və mediada süni intellekt” mövzusunda II simpozium keçirilir.

Xeberler.az məlumat verir ki, tədbir “Anadolu” Agentliyi və Boğaziçi Universitetinin əməkdaşlığı, Türkiyənin Mədəniyyət və Turizm Nazirliyinin dəstəyi ilə təşkil edilib. Tədbirdə çıxış edən Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fahrettin Altun bu gün bəşəriyyətin qlobal səviyyədə ədalət problemi ilə üzləşdiyini deyib. O, ədalət böhranını dərinləşdirən əsas səbəblərdən birinin də bütün dünyanı təsiri altına alan media imperializmi və rəqəmsal faşizm olduğunu diqqətə çatdırıb.

F.Altun tədbirdə mediada istehsal olunan məlumat, xəbər və əsərlərin, eləcə də bütün bunların arxasında duran düşüncə insanlarının hüquq və haqlarını qorumaq məqsədilə bir araya gəldiklərini bildirib.

O, xəbər istehsalının bir tərəfdən müxbirin əməyinə, tədqiqatına və analizinə, digər tərəfdən isə yayımlayan qurumun redaktə seçimləri, cəhdi, cəsarəti, imkanları və bacarıqlarına möhtac olduğunu diqqətə çatdıraraq, real xəbər istehsalının zəhmətli, maliyyə və əmək tələb edən mürəkkəb iş olduğunu vurğulayıb.

“Anadolu” Agentliyi İdarə Heyətinin sədri və baş direktoru Serdar Karagöz çıxışında “Reuters Institute”nun tədqiqatlarına diqqət çəkərək dünya üzrə insanların 62 faizinin sosial media platformalarından istifadə etdiyini, bu qrupun isə 48 faizinin eşitdiklərinə, gördüklərinə, oxuduqlarına reaksiya verdiklərini deyib.

Qeyd edək ki, sahə üzrə peşəkarlar, hüquqşünaslar, alimlər və texnologiya mütəxəssislərinin iştirak etdiyi simpoziumda medianın rəqəmsallaşması ilə yaranan hüquqi, etik və texnoloji məsələlər müzakirə edilir, rəqəmsallaşmanın mediada müəllif hüquqlarına təsiri, süni intellektin xəbərin hazırlanmasında istifadə imkanları və riskləri ətrafında fikir mübadilələri aparılır.

Mediada süni intellekt və müəllif hüquqları ilə bağlı məlumat mübadiləsi və əməkdaşlıq imkanları yaradaraq sektora töhfə verməyi hədəfləyən tədbir “Avropa İttifaqının rəqəmsal tək bazar direktivinə dair üzv ölkələrin təcrübələri”, “Rəqəmsallaşmanın jurnalistikada yaratdığı müəllif hüquqları pozuntularının aradan qaldırılması üçün Türkiyədə həll axtarışları” və “Xəbər istehsalında süni intellekt-media-müəllif hüquqları üçbucağı” mövzularında panel iclaslarla davam etdirilir.

Tədbirdə Türkiyə ilə yanaşı, dünyanın müxtəlif ölkələrindən sahə üzrə mütəxəssislərin “Rəqəmsal platformadakı iş modellərinin müəllif hüquqlarının ölçüsü”, “DSM direktivinin daxili hüquqa keçirilməsi-Almaniya və İtaliya təcrübələri, “Xəbərin müəllif hüquqları-Türkiyə üçün bir model təklifi”, “Türkiyədə müəllif hüquqları” və s. kimi mövzularda məruzələr dinləniləcək.