Ədliyyə Nazirliyi ötən ilin sonu Elektron Hərrac Portalını (
herrac.gov.az) istifadəyə verib.
Bu rəqəmsal platformada məhkəmə qərarları ilə müsadirə olunan daşınar və daşınmaz əmlaklar (avtomobil, mənzil, qeyri-yaşayıs sahəsi, fərdi evlər və s.) satışa çıxarılır.
Xeberler.az bildirir ki, buna Azərbaycan İnternet Formunun Prezidenti, ekspert Osman Gündüz münasibət bildirib.
Ekspert bildirib ki, əvvəllər məhkəmə qərarı ilə borclu hesab olunanların əmlakları hansısa bir qapalı məkanlarda, xüsusi hərrac təşkilatları tərəfindən satışa çıxarılırdı:
"İcra məmurları bu cür ixtisaslaşmış hərrac təşkilatlarına sifariş verirdi ki satılacaq filan əmlak var, təcili hərrac təşkil edin.
Təbii ki, onlar da maraqlı olurdular ki, ancaq qabaqcadan müəyyənləşdirdikləri şəxslər bu hərracda iştirak etsin. Yəni sui-istifadə üçün münbit şərait vardı.
Belə demək mümkünsə, adi bir vətəndaşın bu hərracdan xəbər tutması, iştirak etməsi və hansısa bir qızıl məmulatı, evi, yaxud maşını udması ağlabatan görsənmirdi.
Hətta elə hallar olub ki, bu cür qapalı hərraclarda uduş əldə edən vətəndaşlar müxtəlif bəhanələrlə əmlakı əldə edə bilməyiblər".
Osman Gündüzün sözlərinə görə, Ədliyyə Nazirliyi ötən ilin sonu hərraclarla bağlı mühiti tam rəqəmsallaşdırıb, rəqəmsal bir hərrac platforması (
herrac.gov.az ) yaradıb:
"Hamı üçün bərabər əsaslarla və şəffaf formada hərraclarda iştirak imkanı yaradıb. Artıq məhkəmənin və digər orqanların qərarı ilə müsadirə olunan bütün əmlaklar yalnız bu hərrac vasitəsilə, rəqəmsal formada satışa çıxarıla bilər.
Auksion formasında satış həyata keçirilıir. Hərrac haqqında öncədən ətraflı məlumat verilir və istənilən şəxs, istənilən mərhələdə qoşula bilər.
Vətəndaşlar və hüquqi şəxslər portalda qeydiyyatdan keçməklə şəxsi kabinet formalaşdırırlar. Qaydalar portalda yerləşdirilib. Hərrac sisteminin iş prinsipi və qaydaları çox sadədir. Adi rəqəmsal savada malik olan istənilən şəxs bu prosesdə iştirak edə bilər.
Əlbəttə, bu istiqamətdə maarifləndirməni, rəqəmsal savadlılığı artırmaq da faydalaı olardı".
Hərracda adi vətəndaş uduş əldə edə bilərmi?
Ekspert suala cavab olaraq bildirib ki, şəffaf və ədalətli formada keçirilən herrac.gov.az –da iştirak etməklə və düzgün yanaşma sərgiləməklə böyük fayda götürmək olar:
"Hərrac iştirakçıları bazar qiymətindən xeyli aşağı nəsə əldə etməklə həm daha uyğun şərtlərlə şəxsi ehtiyaclarını qarşılaya bilər, yaxud da udduğu əmlakı sonradan satışa çıxarmaqla xeyli gəlirlər əldə edə bilər.
Ədliyyə Nazirliyinin rəqəmsal hərrac platforması şəffaflığı, səmərəliliyi və rahatlığı artırmaq baxımından çox faydalı təşəbbüsdür və təqdirəlayiq bir addımdır".
