TƏHLİL VƏ RƏYLƏR

Azərbaycan İnternet Forumunun Prezidenti, ekspert Osman Gündüz Rəqəmsal İnkişaf Şurasının ilk iclasını şərh edərək, qəbul olunan qərarların operativ icrasının vacibliyini vurğulayıb.

Ekspert qeyd edib ki, Birinci vitse-prezident Mehriban Əliyevanın sədrliyi ilə keçirilən Rəqəmsal İnkişaf Şurasının ilk iclası sektorda uzun müddətdir böyük maraqla gözlənilirdi və bu toplantı ölkədə rəqəmsal transformasiyanın idarə edilməsində yeni mərhələnin başlanğıcı kimi qiymətləndirilə bilər.

Onun sözlərinə görə, son dövrlər rəqəmsal sektorda müşahidə olunan ləngimələr, qərarların və razılaşdırmaların uzanması, iri rəqəmsal layihələrin azalması fonunda Şuraya gözləntilər olduqca yüksəkdir. Xüsusilə region ölkələrinin süni intellekt və rəqəmsal iqtisadiyyat istiqamətində sürətlə irəliləməsi Azərbaycanın da bu sahədə fəaliyyətini sürətləndirməsini zəruri edir.

O.Gündüz bildirib ki, iclasda təqdim olunan məlumatlara əsasən, 2026–2028-ci illəri əhatə edən Fəaliyyət Planı çərçivəsində 58 təşəbbüs müəyyən edilib, 40 dövlət qurumu üzrə yol xəritələri hazırlanıb və onların bir hissəsi artıq təsdiqlənib və ya təsdiq mərhələsindədir. Süni intellekt, kibertəhlükəsizlik, innovasiya ekosistemi, Milli Məlumat Hövzəsi, Hökumət Buludu, myGov platformasının genişləndirilməsi və qanunvericilik islahatları əsas prioritet istiqamətlər kimi müəyyənləşdirilib.

Ekspert hesab edir ki, bütün bunlar müsbət siqnallar olsa da, bazar hələ də bu qərarların real nəticələrini hiss etmir. Onun fikrincə, iri rəqəmsal layihələrin, yeni tenderlərin və maliyyələşmə proseslərinin başlaması ləngiyir ki, bu da İT bazarında fəaliyyət göstərən şirkətlərin üzləşdiyi əsas problemlərdən biridir.

Osman Gündüz vurğulayıb ki, Şuranın yaradılması koordinasiyanın gücləndirilməsi baxımından mühüm addımdır. Lakin bu koordinasiya əlavə bürokratik mərhələlərə və uzun razılaşdırma proseslərinə çevrilməməlidir. O, katiblik funksiyasını həyata keçirən Rəqəmsal İnkişaf və Nəqliyyat Nazirliyinin səylərini daha da gücləndirməsinin vacibliyini qeyd edib.

Ekspertin sözlərinə görə, rəqəmsal transformasiya çeviklik, sürətli qərarvermə və təşəbbüskarlıq tələb edir. Bu baxımdan, dövlət qurumlarında rəqəmsal transformasiya layihələrinin sürətləndirilməsi, maliyyələşmə mexanizmlərinin işə salınması və biznes üçün yeni imkanların yaradılması xüsusi əhəmiyyət kəsb edir.

O.Gündüz ümid etdiyini bildirib ki, ilin ikinci yarısında dövlətin rəqəmsal layihələri, süni intellekt təşəbbüsləri, innovasiya proqramları və yerli texnologiya şirkətləri üçün yeni imkanlar daha sürətlə reallaşdırılacaq.