AZNET

2014-cü ilədək Yaponiyanın məişət elektronikası istehsalçısı Panasonic şirkəti yarımkeçiricilərin istehsalı ilə məşğul olan əməkdaşlar ştatını iki dəfə azaldacaq və xarici aktivlərdən imtina edəcək.

Xəbərlər-in verdiyi məlumata görə, şirkətin İndoneziya, Çin, Malayziya və Sinqapurda yerləşən fabrikləri fəaliyyətini dayandıracaq və bəziləri satışa çıxarılacaq. Yarımkeçiricilərin istehsalı üzrə bölmədə iş yerlərinin sayı ümumilikdə 14 mindən 7 minədək azaldılacaq. Qeyd edək ki, yarımkeçiricilər sahəsi Yaponiya istehsalçısının fəaliyyətini məhdudlaşdırdığı üçüncü istehsal sahəsidir.

Avqustun sonunda şirkət tələbatın az olması səbəbindən smartfonlar bazarını tərk edib, oktyabrın əvvəlində plazma panellərin istehsalını dayandırıb. Şirkətin hələlik mənfəət əldə etdiyi yeganə sahə günəş batareyaları və tibbi avadanlıq istehsalıdır.

Bu il Panasonic avtomobil elektron cihazları kimi bazarlarda iştirakını genişləndirmək, habelə radar və parktroniklərin istehsalına başlamaq qərarına gəlib. Bundan başqa, istehsalçının dünya televizor bazarındakı payı da azalmaqda davam edir. Belə ki, Yaponiyanın Sony, Panasonic və Sharp şirkətlərinin dünya televizor bazarında payı ümumilikdə 20 faizi ötmür. Öz növbəsində Koreya istehsalçıları Samsung və LG Electronics bazarda müvafiq olaraq 27,7 və 15 faizlik paya sahibdirlər.

Xeberler.az