RƏQƏMSAL DÜNYA

Qərbi Kaspi Universiteti Texnoparkı martın 30-da İqtisadiyyat Nazirliyinin təşəbbüsü ilə keçirilən “Biznes-inkubatorlar kiçik sahibkarlığın inkişafında uğurlu platformadır” adlı tədbirdə iştirak edib.

Universitetdən Xeberler.az-a verilən məlumata görə, tədbirdə ölkədə fəaliyyət göstərən texnoparklar, biznes-inkubasiya mərkəzləri və digər bu kimi müəssisələrinin əməkdaşlıq əlaqələrinin qurulmasını nəzərdə tutan memorandum imzalanıb.

Görüşdə çıxış edən İqtisadiyyat Nazirinin müavini Sahib Məmmədov bu sahədə görülmüş işlər barədə məlumat verib və əməkdaşlığın əhəmiyyətini qeyd edib.

Bildirilib ki, əməkdaşlıq ölkədə sahibkarlıq fəaliyyətinin inkişafına dəstək məqsədi ilə fəaliyyət göstərən müəssisələrin bundan sonra əlaqəli şəkildə çalışması, biznes layihələrin istiqamətlərinə görə lazım gələrsə tərəfdaş müəssisələrə ötürülməsi, təcrübə mübadiləsini və digər bu kimi əlaqələrin inkişaf etdirilməsini özündə ehtiva edir.

Daha sonra biznes inkubatorların və startapların nümayəndələri çıxış edərək öz fəaliyyətləri, həyata keçirilən innovativ layihələr və yeni biznes imkanları barədə danışıb, tədbirin biznes inkubatorları arasında əməkdaşlığın genişləndirilməsi, eyni zamanda startaplar tərəfindən reallaşdırılan innovativ layihələrə potensial invsestorların cəlb olunması baxımından önəmini qeyd ediblər.

Qərbi Kaspi Universiteti Texnoparkı tədbirdə 3 startap layihə (Parking APP, Vooby, My task) ilə təmsil olunub. Onlardan biri universitetin tələbəsinin, digər ikisi isə universitetin mütəxəssislərinin mentorluğu ilə məktəblilər tərəfindən hazırlanmış layihələrdir.

Sonda 18 biznes inkubator arasında əməkdaşlığın genişləndirilməsi və birgə fəaliyyətin həyata keçirilməsinə dair memorandum imzalanıb.

Qeyd edək ki, Qərbi Kaspi Universitetinin Texnoparkında Biznes-İnkubasiya Mərkəzi, Texnoloji Transfer Ofisi, Mexatronika və Robototexnika Laboratoriyası, İdeya Bankı və başqa mərkəzlər fəaliyyət göstərir.

Texnoparkdan sərbəst istifadə imkanı yaradılıb. Belə ki, ideyası olan tələbələr və şagirdlər texnoparka müraciət edərək dəstək ala bilirlər. Texnopark orta məktəb şagirdlərini də müxtəlif layihələrə, praktik çalışmalara cəlb edir.

Texnoparkda fəaliyyət göstərən Mexatronika və Robototexnika laboratoriyasında isə təşəbbüskar mühəndislər hazırlamaq istədikləri robotların və digər bu kimi layihələrin reallaşdırılması üçün lazım olan bütün avadanlıq və materiallarla təmin olunublar.

Texnopark ideyaların reallaşdırılmasına dəstək verməklə yanaşı, tələbələrdə praktik düşünmə, eləcə də mühəndis təxəyyülünün formalaşmasına xidmət edir.

Xeberler.az