PROQRAMLAR

AR Elm və Təhsil Nazirliyinin (ETN) İnformasiya Texnologiyaları İnstitutunda ETN tərəfindən maliyyələşdirilən “Kibersuveren dövlətin formalaşdırılması və onun informasiya təhlükəsizliyinin təmin edilməsi üçün intellektual metod və alqoritmlərin işlənməsi” adlı elmi-tədqiqat layihəsi üzrə cari ildə görülən işlərin müzakirəsinə həsr olunmuş növbəti seminar keçirilib.

Xeberler.az bildirir ki, iclasda AMEA-nın vitse-prezidenti, institutun baş direktoru, akademik Rasim Əliquliyev çıxış edərək institutda kibersuverenliyin müxtəlif problemlərinin araşdırılması istiqamətində məqsədyönlü fəaliyyətə başlanıldığını qeyd edib. Alim müasir dövrdə rəqəmsal dövlətin kibersuverenliyinə yönələn daxili və xarici təhlükələrin mənbəyinin müəyyənləşdirilməsi, onların aradan qaldırılması istiqamətində tədqiqatların aparılmasının böyük aktuallıq kəsb etdiyini vurğulayıb. 

Akademik Rasim Əliquliyev institutda fəaliyyət göstərən alim və mütəxəssislərə kibersuverenliyin yaratdığı təhlükələr və risklərlə bağlı çoxaspektli tədqiqatlar aparmağı tövsiyə edib, əldə olunan elmi nəticələrin nüfuzlu beynəlxalq jurnallarda dərc olunmasının vacibliyini vurğulayıb.

Tədbirdə, həmçinin cari ilin noyabr ayında “Konstitusiya və suverenlik ili” və Beynəlxalq İnformasiya Təhlükəsizliyi Gününə həsr olunmuş “Dövlətin kibersuverenliyinin təmin olunmasının aktual elmi-nəzəri və praktiki problemləri” mövzusunda elmi sessiyaya hazırlıqla bağlı müzakirələr aparılıb, yüksək keyfiyyətli məruzələrin hazırlanmasına dair təklif və tövsiyələr səsləndirilib.

Sonra layihə iştirakçıları ilin II və III rüblərində yerinə yetirilmiş işlər barədə hesabat təqdim ediblər. Tədqiqat istiqamətləri üzrə fikir mübadiləsi aparılıb, iştirakçıların sualları cavablandırılıb.

Akademik Rasim Əliquliyev müzakirəyə çıxarılan elmi problemlərlə bağlı təklif və tövsiyələrini irəli sürüb, layihə çərçivəsində aparılan tədqiqatların ölkə elminin inkişafına mühüm töhfələr verəcəyinə əminliyini ifadə edib.