Azərbaycan Milli Elmlər Akademiyasının (AMEA) Rəyasət Heyətinin növbəti iclası keçirilib.
İclası giriş sözü ilə açan AMEA-nın prezidenti akademik İsa Həbibbəyli gündəlikdə duran məsələlər barədə məlumat verib. Tədbirdə Akademiyanın rəhbərliyi, elmi müəssisə və təşkilatların direktorları və aidiyyəti şəxslər iştirak ediblər.
İclasda Azərbaycan Prezidentinin “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”ndan irəli gələn vəzifələr müzakirə olunub. Akademik İsa Həbibbəyli bildirib ki, sənəddə AMEA-nın da qarşısında bir sıra vəzifələr müəyyən edilib.
Qeyd olunub ki, son illərdə Akademiyada rəqəmsallaşma və süni intellekt sahəsində mühüm addımlar atılıb. AMEA-nın Rəyasət Heyəti aparatında “Rəqəmsal Akademiya, Süni intellekt və Elektron xidmətlər” şöbəsi fəaliyyət göstərir, elmi müəssisələrdə isə “Rəqəmsal elm sahəsi və süni intellekt” bölmələri yaradılıb.
Bundan əlavə, Akademiyada sənəd dövriyyəsinin tam elektronlaşdırıldığı, elektron kitabxana və elektron arxiv sistemlərinin inkişaf etdirildiyi bildirilib. İclasda AMEA nəzdində Respublika Seysmoloji Xidmət Mərkəzində “Kompleks geofiziki tədqiqatlarda süni intellektin tətbiqi” şöbəsinin yaradılması barədə də qərar qəbul olunub.
Eyni zamanda AMEA-nın akademik Ziya Bünyadov adına Şərqşünaslıq İnstitutunda “Rəqəmsal şərqşünaslıq və süni intellekt”, Fəlsəfə və Sosiologiya İnstitutunda isə “Rəqəmsal sosiologiya və sosioloji tədqiqatlar” şöbələrinə yeni rəhbər təyinatları təsdiqlənib.
İclasda gündəlikdə olan digər təşkilati və kadr məsələləri də müzakirə edilərək müvafiq qərarlar qəbul olunub.
