SÜNİ İNTELLEKT VƏ DATA

İyulun 4-də Azərbaycan Milli Elmlər Akademiyasının (AMEA) İctimai Elmlər Bölməsinin Elmi şurasının növbəti iclası keçirilib. İclası AMEA-nın vitse-prezidenti vəzifəsini icra edən, İctimai Elmlər Bölməsinin Elmi şurasının sədri akademik Gövhər Baxşəliyeva açaraq tədbirin gündəliyini iştirakçıların diqqətinə çatdırıb.

Xeberler.az bildirir ki, iclasda Fəlsəfə və Sosiologiya İnstitutunun direktoru tarix elmləri doktoru, professor İlham Məmmədzadənin “Süni intellektin aktual etik problemləri” mövzusunda məruzəsi dinlənilib.

Professor bildirib ki, ölkə rəhbərinin “Azərbaycan Respublikasının 2025-2028-ci illər üçün süni intellekt Strategiyasının təsdiq edilməsi haqqında” 2025-ci il 19 mart tarixli Sərəncamı ölkəmizin inkişafında xüsusi önəm kəsb edir.

Məruzəçi diqqətə çatdırıb ki, süni intellekt fəlsəfəsi mövzusuna olan marağımız, təbii ki, bizi şüur fəlsəfəsi və süni intellekt haqqında biliklərin şüurumuz barəsində yeni bir şey öyrənməyə, etikada yeni bilik əldə etməyə imkan verə biləcəyi xüsusunda düşüncələrə gətirib çıxarıb. Alim vurğulayıb ki, varlıq, ontologiya və etika problemləri şüurun mahiyyəti barədə düşüncələr, şüur və beyin haqqında biliklər olmadan filosofun onları necə dərk etdiyi nəzərə alınmadan konseptual surətdə ifadə oluna bilməz: “Şüur fəlsəfəsi, həmçinin müasir elm fəlsəfəsi və fəlsəfə tarixinin, fənlərarası tədqiqatların, gələcəyin elm və təhsili haqqında təsəvvürlərin necə olmağının, onların (həmçinin, şüur və biliyin və s.) bir-birini necə keçdiyinin, qarşılıqlı münasibət və təsirdə bulunduğunun dərkinə gətirib çıxarır. Fəlsəfə və elmdə, təhsildə, o cümlədən bir çox müasir elmi məktəb və cərəyanların irsi və yaradıcılığında şüurun və etikanın bu cür təhlili baxımından çox şeyə yenidən nəzər salmağın vaxtı çatmışdır”.

Məruzə dinlənildikdən sonra mövzu ətrafında müzakirələr aparılıb.

İclasda bir sıra elmi-təşkilati və kadr məsələləri də müzakirə olunub.

AMEA-nın İctimai Elmlər Bölməsinin elmi-tədqiqat müəssisələrinin 2025-ci il üzrə yarımillik elmi təşkilati hesabatları müzakirə olunub. Diqqətə çatdırılıb ki, elmi-tədqiqat müəssisələri üzrə 2025-ci ilin birinci yarısı üçün çap olunan kitabların sayı 23 (1-i xaricdə), monoqrafiyaların sayı 37 (5-i xaricdə), 449 məqalədən (107-si xaricdə), 329 tezisdən (110-u xaricdə) impakt faktorlu (Web of Science və Scopus) jurnallarında çap olunan məqalələrin sayı 20-dir. Cari ilin birinci yarısı ili üçün elmi-tədqiqat müəssisələrində fəlsəfə doktoru hazırlığı üzrə müdafiə edənlərin sayı 4, elmlər doktoru hazırlığı üzrə müdafiə edənlərin sayı 3-dür.

Sonra AMEA-nın Fəlsəfə və Sosiologiya İnstitutunda daxili imkanlar hesabına və mövcud ştat vahidi əsasında Multikulturalizm və tolerantlıq fəlsəfəsi şöbəsinin bazasında İdentiklik, multikulturalizm və azərbaycançılıq fəlsəfəsi, eləcə də İnformasiya cəmiyyəti və rəqəmsal inkişaf fəlsəfəsi şöbəsinin bazasında Rəqəmsal inkişaf və süni intellektin fəlsəfi problemləri şöbələrinin yaradılması haqqında məsələlər müzakirə olunub, AMEA Rəyasət Heyəti qarşısında vəsatət qaldırılıb.