Elektron hökumət sahəsində idarəetmənin təkmilləşdirilməsi haqqında 24 noyabr 2022-ci il tarixli Prezident fərmanına əsasən Azərbaycanda Rəqəmsal Məcəllə hazırlanmalıdır.
Qeyd edim ki , belə bir Məcəllənin hazırlanması ilə bağlı Rəqəmsal İnkişaf və Nəqliyyat Nazirliyinin təşəbbüsləri təqdirəlayiq bir addımdır.
Məcəllənin layihəsi 9 ay müddətində Nazirlər Kabineti tərəfindən hazırlanıb Prezidnetə təqdim olunmalıydı.
Lakin, hələlik adı çəkilən Layihənin hazırlanması və Prezidentə təqdim edilməsi haqqında hər hansı bir açıqlama yoxdur.
Ötən il RİNN yanında İnnovasiya və Rəqəmsal İnkişaf Agentliyi Rəqəmsal Məcəllənin hazırlanmasına start verilməsi haqqında məlumat paylaşmışdı.
Təəssüf ki, hələlik bu layihədən bir xəbər yoxdur.
Diqqət çəkən məqam həm də odur ki, hələlik maraqlı tərəflərin iştirakı ilə bu istiqamətdə hər hansı bir müzakirə aparılmayıb.
Məcəllənin strukturu, mahiyyəti haqqında məlumatlar yoxdur.
Məcəllənin hazırlanmasına köməklik məqsədilə cəlb olunacaq beynəlxalq məsləhətçi şirkət haqqında da bir açıqlama verilməyib.
Yeri gəlmişkən, xatrlayıram ki, bir neçə il öncə İnnovasiya Strategiyasını hazırlamalı olan beynəlxalq məsləhətçi şirkət, Boston Konsalting Qrupu yetərincə böyük vəsait almasına baxmayaraq indiyədək də layihəni ortaya çıxara bilməyib.
Rəqəmsal Məcəllədə nələr olmalıdır ?
Düşünürəm ki, Rəqəmsal Məcəllə əsasən vətəndaşların rəqəmsal hüquqları, rəqəmsal hökumət quruculuğu və rəqəmsal biznes sahəsini əhatə etməlidir.
Məcəllə ölkədə bütöv rəqəmsal mühitin inkişafına yönəlməlidir, bu rəqəmsal mühitdə dövlət, biznes və vətəndaş arasında münasibətləri tənzimləməli, rəqəmsal transformasiyanın inkişafına təkan verməlidir.
Bu sənəd ən müasir çağırışları, yeni rəqəmsal mühitdə vətəndaşların hüquqlarının qorunmasını, süni intellect məslələrini əhatə etməli, rəqəmsal inkişafa mane olan tənzimləmələri aradan qaldırmalıdır.
Hazırda rəqəmsal sahədə tənzimlədə ciddi problemlər var. Hələlik İRİA bu sahədə irəliləyiş yarada bilməyib. Rəqəmsal hökumət quruculuğun hüquqi təminatında lənglik uzun müddətdir ki davam edir.
Hələ bir dənə də olsa rəqəmsal sənəd MyGov-da yoxdur. Orada olanlar sadəcə məlumat xarakteri daşıyır.
İRİA bu istiqamətdə səylərini gücləndirməlidir
Ümid edirəm İRİA-nın beynəlxalq məsləhətçi şirkətlə birgə hazırladığı bildirilən Rəqəmsal Məcəllə ölkədə rəqəmsal transformasiyanın və rəqəmsal biznesin inkişafına, vətəndaşlar üçün daha münbit rəqəmsal mühitin formalaşmasına şərait yaradacaq.
Osman Gündüz
